УИХ-ын гишүүн Б.Бат-Эрдэнээс улс төрийн цаг үеийн асуудлаар байр суурийг нь сонирхлоо.

Тэрбээр "МАН-ын бага хурлаар хамтарсан ЗГ-ын асуудлыг шийдвэрлэх нь зөв гэж бодож байгаа ч орон нутагт сэтгэл дундуур байгаа. Тэнд ард иргэд ажилгүйдэлтэй нүүр тулсан. Мега төслүүд явж байгаа нь сайн ч асуудал байсаар байна. Ерөнхий сайдтай холбоотой асуудалд намын бага хурал хамааралгүй. Хамтарсан ЗГ-ын асуудал зөвхөн өнөөдөр сөхөгдөөгүй. Өмнө нь 5-6 удаа яригдаж байв. Ард иргэд хардах, нотлохыг шаардах эрхтэй, төрийн өндөр албан тушаалтан нотлох үүрэгтэй.

Хууль бусаар олсон орлогыг хураахтай холбоотой асуудал яригдаж буй нь явцуу бүү байгаасай. Төрийн дунд шатны албан тушаалтнууд хамгийн их авлигажсан байгаа шүү. УИХ-ын гишүүд, сайд, дарга нар олон нийтийн өмнө ил байдаг тул харьцангуй гайгүй байдаг. Тиймээс энэ хууль бол зөвхөн төрийн өндөр албан тушаалтан бус төрийн бүх албан тушаалтанд хэрэгжих ёстой. Ёс зүйн хувьд хууль хяналтын байгууллагууд шийдвэрээ гаргах ёстой.

МАН-ын их хурлаар намын даргын асуудлыг хэлэлцдэг. Бага хурлаар ерөнхий нарийн бичгийн даргыг сонгодог дүрэмтэй. Бид маш олон жил улс төржсөн. Хамтарсан ЗГ байсан болохоор 24 жилийн ураны гэрээг, хил холболтын төмөр замын гэрээг ч мөн хийсэн. Эвлэлдэн нэгдээд улс төржилгүйгээр олон асуудлыг шийдэж байгаа тул улс орон, ард иргэдийн амьдралыг бодъё гэвэл цаашид хамтарсан ЗГ үргэлжлэх ёстой гэсэн байр суурьтай байна.