Азийн Шинжлэх ухаан технологийн паркуудын XXVII-р их хурал энэ сарын 19-21-нд Улаанбаатарт болж байна.

Азийн Шинжлэх ухааны паркуудын холбооны 27-р их хурал /ASPA -2024/ Улаанбаатар хотод анх удаа болж байна. Уулзалтад 11 орны 200 гаруй шинжлэх ухааны болон мэдээллийн технологийн паркийн удирдлагууд цугларч, илтгэл танилцуулж, хэлэлцүүлэг өрнүүлэв.

Тус олон улсын хурлыг нээж, Цахим хөгжил, инновац, харилцаа холбооны сайд Ц.Баатархүү үг хэллээ. Тэрбээр “Монгол Улсын Засгийн газар инновац, түүний дэд бүтцийг хөгжүүлэх чиглэлд онцгой анхаарч, нийтийн мэдээллийн дэд бүтцийг ирэх 4 жилийн хугацаанд хүн бүрд, сурагч бүхэнд хүртээмжтэй байх томоохон зорилт тавьж ажиллаж байна.

Төр хувийн хэвшлийн хамтын ажиллагааг төрийн бодлогоор дэмжин салбарын эдийн засгийн үр өгөөжийг нэмэгдүүлэх, ялангуяа мэдээллийн технологийн салбарыг улс орныхоо эдийн засгийн нэг тулгуур багана болгох чиглэлд анхаарч ажиллана. Мэдээллийн технологийн үйлдвэрлэлийг дэмжих виртуал бүсийг мэдээлэл технологийн үндэсний паркт тулгуурлан байгуулж, виртуал бүсэд бүртгүүлсэн мэдээллийн технологийн компаниудад татварын болон татварын бус олон хөнгөлөлт эдлүүлнэ.

Виртуал бүсэд бүс нутгийн төдийгүй дэлхийн мэдээллийн технологийн компаниудыг үйл ажиллагаа явуулах нөхцөлөөр хангахаар зорин ажиллана, Монгол Улс Азийг тивийг холбосон шинжлэх ухаан, технологийн паркуудын гүүр болно” гэдгийг онцлов.

“Шинжлэх ухаан, технологийн паркуудын бүс нутгийн хөгжилд хүлээх үүрэг, үзүүлэх нөлөө” сэдэв дор зохион байгуулагдаж буй тус хуралд шинжлэх ухааны паркууд хоорондоо хэрхэн хамтарч ажиллах, санхүүжилтийг олон нийт болон төрийн зүгээс хэрхэн шийдэх, түүнийгээ хэрхэн үр дүнтэй зарцуулах, гарааны компаниудыг яаж дэмжих талаар туршлага солилцон, цаашид хэрэгжүүлэх ажлын саналууд зэргийг ярилцах үр дүнтэй уулзалт болно гэсэн хүлээлттэй байгаа юм.

Уг хурлыг Монголд зохион байгуулсны давуу талыг ерөнхий зохион байгуулагчаар ажиллаж буй, Мэдээллийн технологийн үндэсний паркийн Хэвлэл мэдээлэл олон нийттэй харилцах хэлтсийн дарга У.Бибиш "27-р их хурлаар дамжуулан Монгол улсын шинжлэх ухаан, технологи, инновацын чиглэлээр төрөлжсөн байгууллагууд Азийн ижил төрлийн байгууллага, паркуудтай хамтран ажиллах, дэвшилтэт технологийн гарааны бизнесүүдийг олон улсад таниулах, дэмжих хамтын ажиллагааг эхлүүлэх зэрэг томоохон үр дүн гарна" гэв.

Үүний зэрэгцээ Мэдээлэл технологийн үндэсний паркийн захирал Ж.Золзаяа Азийн шинжлэх ухаан технологийн паркуудын төлөөлөн удирдах зөвлөлд албан ёсоор гишүүн болж, нийт долоон парктай хамтын ажиллагааны гэрээ байгуулж, төсөл хөтөлбөрийг хэрэгжүүлэх эхлэлийг тавьжээ.

Б.Маралмаа