Засгийн газар солигдох тоолонгоор Улсын клиникийн төв эмнэлэг (УКТЭ)- ийг Анагаах ухааны их сургуультай нэгтгэх, эсвэл салгах тохиолдол гарч байсан. Сүүлийн үед дээрх хоёр байгууллагыг дахин нэгтгэх тухай яригдах боллоо. УКТЭ-ийн эмч, ажилчид энэ нэгдлийг эсэргүүцэж  түр хороо хүртэл байгуулжээ. УКТЭ-ийн Зүрх судасны тасгийн эрхлэгч, доктор Б.Батболд болон ЭМШУИС-ын Анагаах ухааны сургуулийн захирал, доктор Х.Алтансайхан нараас байр суурийг нь  авсан юм.

Б.Батболд: Нийгмийн эрүүл мэндийн эрх ашиг хохирно

-Эмнэлэг сургууль хоёрыг нэгтгэхийг танай удирдлага юу гэж хүлээж авсан бэ?
-Бид С.Сонин захирал­тай санал солилцож үзсэн. Нэгтгэх боломжгүй гэдэг саналтай байна лээ. Гэвч  Засгийн газрын багт ажил­лаж байгаа болохоор тат­галзаж чадахгүй байх.

-Танай эмнэлэгт хэч­нээн хүн ажилладаг вэ?
-650 гаруй эмч, ажил­чидтай.

-Нэгтгэвэл эмч суви­лагч­дыг олноор нь халах болно гэж түр хорооны­хон хэлж байсан?
-Энэ зүгээр хардлага. Түүнээс илүүтэй нийгмийн эрүүл мэнд, иргэдийн эрх ашиг хохирно гэдэгт санаа зовниж байгаа. Өмнө нь нэгтгэж байхад нэг өвчтөнг 10 гаруй дадлагажигч эмч үзэж хэт төвлөрөл үүсгэж байсан. Энэ нь өвчтөнүүдэд хүндрэлтэй. Дээр нь эмнэл­гийн халдвар хамгааллын дэглэм ноцтой зөрчигдөх аюултай. Ганц сургуулийн эрх ашигт нийцүүлэхийн тулд Улаанбаатар хот тө­дий­гүй бүх аймаг, сумаас иргэд үйлчлүүлдэг УКНЭ-ийг үгүй хийх гэсэн харал­ган бодлогыг явуулж бай­гаад харамсаж байна. Урд нь хоёр байгууллагыг нэгт­гэхэд эмнэлгийн төсөв, эрүүл мэндийн даатгалын сангаас эмч багш нарын цалин, сургалтын зардлын зөрүүг төлөх гэх мэт дутаг­дал гарч байсан. Энэ бай­дал давтагдахгүй гэх газар­гүй.

-Сургууль эмнэлэг хоё­рыг нэгтгэх нь  Ц.Лхаг­васүрэн захирал эсвэл өөр хэн нэгний хувийн сонирхол байж болох уу?
-Боловсролын яам бо­лон ЭМШУИС-д мэдээж ашигтай. Сургууль сургал­тын баазтай болно. Эмнэлэг маань одоо л нэг зөв голь­диролд орох нь уу гэтэл ийм байдал үүсчихлээ. ЭМШУИС-д уг нь харьяа эмнэлэг байгуулах нөхцөл бий. Мөн дүүргийн эмнэлэг, эрүүл мэндийн төвүүдийг түшиглэн сургалт явуулах бүрэн боломжтой.  

-Ерөнхий сайдад гар­гасан мэдэгдлийн хариуг зохистойгоор шийдэхгүй бол суулт хийж, улмаар ажил хаяна гэж байсан. Энэ нь эмнэлэгийн ажилтны ёсзүй, эмчийн тангарагт нийцэх үү?
-Бид өөрсдийн цалин, хангамжийг нэм гэсэн шаард­­лага тавиагүй. Оно­шил­гоо үйлчилгээ, сургалт, эрдэм шинжилгээний цогц үйл ажиллагаа бүхий УКТЭ-ийн статусыг шинэлэг байд­лаар баяжуулан авч үлдэх зорилгыг дэвшүүлсэн.  Нийг­мийн эрүүл мэндийн тусын тулд энэ бүхнийг хийж байгаа.  

Х.Алтансайхан: Аль ч улсын тэргүүлэх эмнэлэг сургуулийн дэргэд байдаг

-Клиникийн төв эм­нэл­гийн эмч, ажилчид гэж түр хороо бай­гуулсан. Тус эмнэлэгийг танай бүтцэд нэгтгэхээр болсон юмуу?
-Одоогоор шийдэгдсэн юм алга. Өнгөрсөн долоо хоногт Н.Болормаа сайд манай сургуулийн үйл ажил­лагаатай танилцсан.  Тэр үеэр бид сайдад Кли­никийн эмнэлэг рүү хөрөнгө оруулалт хийгээч, тоног төхөөрөмж болон үйл ажил­лагааны чадавхийг нь сайж­руулаач гэсэн санал тавь­сан. Үүнээс болоод эмнэл­гийн зарим эмч, сувилагч нар манай сургуульд тус эмнэлгийг нэгтгэнэ гэж ойлгоод байх шиг. Гэхдээ аль ч улсын тэргүүлэх эм­нэлэг үндэсний их сургуу­лийнхаа дэргэд байдаг. Энэ жишгээс манайх  гажих ёсгүй.

-Эмнэлгийг танайд нэгтгэсэн тохиолдолд байгууллагын тогтвортой үйл ажиллагаанд сөр­гөөр нөлөөлнө гэж түр хорооныхон үзэж байгаа?
-Судалгаа, сургалт, эм­нэлгийн үйлчилгээ цогцоо­роо байж их сургууль, эм­нэлгийн үйл ажиллагаа яваг­дана. Манайхан  гадны ул­суудад өндөр өртөгтэй эм­чилгээ хийлгэх болсон. Эрүүл мэндийн тэргүүлэх салбарт ажиллаж байгаа эрдэмтэн, багш нар үүнийг зүгээр хараад сууж чадах­гүй. Тэд өөрийн туршлага дээр үндэслэн их сургуу­лийн харьяа эмнэлэг бай­гуулья гэсэн саналыг тавь­даг. Оюутнуудад хичээл зааж байгаа багш нар үр­гэлж өөрийгөө цэнэглэж байдаг. Манай сургуульд турш­лагатай, чадалтай Ар­дын болон гавьяат эмч олон бий. Тэдний олж авсан дад­лага, туршлага бол нийг­мийн үнэт баялаг. Үүнийг ард түмэнд хүртээх ёстой.

-Эмнэлгийн нэгж сал­барыг ЭМШУИС-ийн тэн­химийн эрхлэгч нар удирд­сан удаа бий. Тэд­нийг хичээлтэй үед эмнэл­гийн оношилгоо эмчил­гээний үйл ажиллагаа алдагдах зэрэг зөрчил гарч байсан гэх?
-Их сургуулийн эмнэ­лэг болсон тохиолдолд бид тус эмнэлгийн бие даасан байдалд оролцохгүй.

-”Сонгдо” эмнэлэг анх танай сургуулийн сургал­тын бааз зориу­лалтаар баригдаж байсан?
-Төрд мөнгө байхгүй. Бидэнд эмнэлэг байхгүй байсан. Бид бизнесийн байгууллагад хандаж санал тавьсан юм. Гэтэл хамтарч ажиллаж байсан байгуул­лага сүүлд нь оруулсан хөрөнгөө төрөөс салгаж авч чадахгүй юм байна гээд барилгаа зарахаар болсон. Тухайн үед тэднээс зөвхөн эрүүл мэндийн салбарт үйл ажиллагаа явуулах бай­гууллагад худалдана шүү гэсэн шаардлага тавьсан. Одоо Солонгосын хөрөнгө оруулалттай “Сонгдо” эм­нэлэг үйл ажиллагаа явуулдаг.

-Танай оюутнууд “Сонг­до” эмнэлэгт сур­галт, дадлага хийдэг үү?
-Хийхгүй байгаа.

С.Ганболд