“Marvel комикс” студи НҮБ-ын стиль имижид санаа тавих гэнэ. Их Британийн The Independent сонинд мэдээлснээр тус хоёр байгууллага хамтран ажиллах гэрээнд хэдийнэ гарын үсэг зурсан бөгөөд “Хүн аалз”, “Гайхамшигт дөрвөл” зэрэг комиксын баатар НҮБ болон ЮНИСЕФ-ийн хүмүүнлэгийн үйл хэрэгт оролцож буй тухай өгүүлэх зурагт сэтгүүл гаргах ажээ.

"Marvel" студи НҮБ-аас төлбөр шаардахгүйн зэрэгцээ комиксуудыг дэлхийн олон хэлээр сая сая хувиар хэвлэхээр төлөвлөжээ.

“Халк”, “Экс хүмүүс” зэрэг олны танил комикс баатруудыг санаачлагч “Marvel” студи нь уран бүтээлээрээ олон улсын байгууллагын ажиллагааг дэмжсээр ирсэн билээ. Тус студийн бүтээсэн анхны баатруудын нэг 1939 оны “Америк ахмад” комиксын эсрэг дүр нь Адольф Гитлер байсан аж.

Бүх цаг үеийн туршид Marvel цуврал комиксийн чиг баримжаа нь АНУ-ын гадаад болон дотоод бодлогоос шалтгаалж ирсэн байна.