Өнгөрсөн оны арванхоёрдугаар сард БНСУ-д болсон онгоцны осол нисгэгчийн алдаанаас үүдэлтэй болохыг шалгалтаар тогтоогоод байна.

Тодруулбал онгоц газардах мөчдөө шувуутай мөргөлдсөн. Үүний улмаас онгоцны баруун хөдөлгүүр ноцтой гэмтсэн.

Гэхдээ эвдрээгүй байсан зүүн хөдөлгүүрийг нисгэгч андуурч унтраасны улмаас онгоц осолдсон гэж үзэж байгаа аж.

Энэ нь албан ёсны дүгнэлт бөгөөд үүнийг өнгөрсөн амралтын өдрүүдээр олон нийтэд танилцуулахаар төлөвлөж байв. Гэхдээ хохирогчдын ар гэрийнхэн эсэргүүцэл илэрхийлсний улмаас түр хойшлуулсан байна.

Хохирогчдын ар гэрийнхэн зурвасын төгсгөлд байсан бетон хаалтын талаар дурдалгүй амиа алдсан нисгэгчийг л буруутгах гэж оролдлоо хэмээн шүүмжилж байгаа юм.

Тэд хэвлэлийн хурал хийхээсээ өмнө дахин нягталж үзэхийг шаардаж байна. Гэхдээ Ройтерс агентлагт нэгэн эх сурвалжийн мэдээлснээр "нотлох баримт болон бусад мэдээлэл хангалттай байгаа тул дүгнэлтийн тайланг өөрчлөхгүй" гэв. 

Эргэн санавал, 2024 оны арванхоёрдугаар сарын 29-ний өглөө 181 хүн тээвэрлэж явсан Jeju Air компанийн онгоц Мүан нисэх онгоцны буудалд газардах үедээ осолдсон.

Газардахын өмнө онгоц шувуутай мөргөлдсөн гэж үзсэн бөгөөд зурвасын төгсгөлд байсан бетон хаалтыг мөргөж, дэлбэрсэн. Энэ ослоос хоёр хүн амьд гарсан юм.

Мөрдөн шалгах ажиллагааны хүрээнд онгоцны хоёр хөдөлгүүрийг энэ оны гуравдугаар сард Франц руу илгээж шинжлүүлсэн.

Харин саяхан гарсан дүгнэлтээр нисгэгч эвдрэлгүй байсан зүүн хөдөлгүүрийг унтрааж, шувуутай мөргөлдсөн баруун талын буюу эвдэрсэн хөдөлгүүрийг ажиллуулсан хэвээр үлдээсэн нь осолд хүргэсэн гэж тогтоожээ.

Эх сурвалж: ВВС