Хүүхдийн парк “Диснейлэнд” болон сүндэрлэнэ гэснээс хойш нэлээд хугацаа өнгөрчээ. Хавар болж байгаатай холбогдуулан хүүхдийн паркын шинэчлэл ямар байгааг очиж сонирхлоо. Өнгөрсөн сарын 22-ноос эхлэн засварын ажил эхэлсэн талаар төслийн ажилтнууд ярьж байлаа. Хүүхдийн “хуучин” паркаас “Мангасын ам”, хиймэл нуурын голд байрлах “Загас” хоёр л хэзээний танил дүрээрээ үлдэж, бага зэрэг өнгөө засчээ. Харин  алсын харагч, морин тойруулга, гинжит, галзуу хулгана, саран савлуур, сансрын хөлөг, агаарын дугуй, эргэлддэг дельфин, “Далайн дээрэмчин” гээд олон тоглоом шинээр суурилуулж дуусчээ. Шинээр суурилуусан алсын харагчын хувьд 40 метрийн өндөртэй, нэг удаад 112 хүүхэд явах бүрэн боломжтой юм байна. 

Хиймэл нуурын хажууд  нэгдүгээр давхартаа ресторан, хоёрдугаар давхартаа угсаатны музейн зориулалттай барилга бариад эхлэчихэж. Мөн хиймэл нуурын зүүн талд автомат тоглоом, түргэн хоолны газар, бяцхан хүүхдүүдэд зориулсан тоглоомын талбай зэрэг нэг дор байрлах юм байна. Харин албаны эх сурвалжийн хэлснээр “Хүүхдийн парк энэ жил ажиллахгүй. Ирэх наймдугаар сар гэхэд эхний хэсгийн цогцолборын ажил  бүрэн дуусна” гэв.

Юутай ч хүүхдүүд Эх үрсийн баяраар дахиад л хүүхдийн парктаа очиж чадахгүй нь ээ. 

Б.Ирээдүй