Улсдаа ганцхан байдаг гэх урьдчилан хорих төв буюу "Ганц худаг"-ийн хорих анги ачааллаа даахгүй болсон. Дээр нь барилга нь дэндүү хуучирсан. Иймд ТЭЦ-IV-ийн ойролцоо шинэ байр баригдах болсон. Тэнд ял шийтгэл авахаасаа өмнө буюу хэрэгтнээр сэжиглэгдэж байгаа хүмүүс хоригддог. Тус урьдчилан хориход хэрэгтнээр сэжиглэгдэж байгаа хүмүүс нэг өрөөнд гэхэд л дөрвөөс тавуулаа байдаг. Мөн хоригдлуудаас сүрьеэ өвчин илрэх нь ихсэж байгаа гэх яриа ч олны дунд мэр сэр яригддаг.

Тэгвэл шинээр баригдаж буй барилга энэ тал дээр шаардлага хангасан байгаа талаар Шүүхийн шийдвэр гүйцэтгэлийн ерөнхий газрын тогтоол гүйцэтгэх газрын дэд дарга Б.Энх-Амгалангаас тодрууллаа.

-Тус хорих ангайн барилгын ажил ямар шатандаа явж байгаа вэ?
-Одоогоор барилгын ажил ерөнхийдөө дууссан гэж үзэж болно. Харин хоёр гурван объект шинээр барих л үлдсэн. Мөн дотор заслын ажил явагдаж байгаа.

-Тус хорих анга нь хэдэн хүний багтаамжтай вэ?
-Мянган хүний багтаамжтайгаар барилга баригдсан. Тус урьдчилан хорих ангид хэрэгтнээр сэжиглэгдсэн хүмүүс ирдэг юм.

-Ганц худгийн хорих ангид нэг өрөөнд олуулаа байдаг гэсэн. Энэ шинэ хориход хэдүүлээ байх вэ?
-Нэг өрөөнд хоёулаа байхаар төлөвлөгдсөн. Сэжигтнээр татагдаж байгаа учир яг хоригдол гэж үзэх хэмжээнд очоогүй учраас хүний эрхийг дээдэлсэн гэдэг утгаар нь авч үзэж бүх юм стандартын дагуу хийгдсэн. Жишээлбэл халаалт дулаан, мөн ариун цэвэр, эрүүл ахуйн шаардлага бүрэн хангагдсан гэж үзэж байгаа.

-“Ганц худаг"-ийн хорих анги хэзээ шинэ байрандаа нүүж орох вэ?
-Ирэх зунаас буюу найман сард ашиглалтад орж нүүх байх.

-Ганц худгийн хорих ангийг ямар зориулалтаар ашиглах вэ?
-Одоогоор тэр тал дээр талаар шийдвэр гараагүй байгаа.

Ц.Бямбажав http://www.niigmiintoli.mn/