Хийн бууны Азийн аварга шалгаруулах тэмцээн БНХАУ-ын Нанжин хотноо энэ сарын 4-9-нд болж өндөрлөлөө. Тэмцээнд манай гар буу, урт бууны тамирчид эмэгтэй, эрэгтэйчүүдийн бүтэн багаар оролцсон. Мөн өсвөрийн тамирчид маань ч онч сорьсон юм.

Эмэгтэйчүүдийн хийн гар бууны 10 метрийн дасгалд ОУХМ Ц.Мөнхзул (Спирт бал бурам), гавьяат тамирчин О.Гүндэгмаа (Алдар) нар 383 оноогоор мөнгө, хүрэл медалийг тус тус хүртлээ. Н.Ганчимэг (Хилчин) дээрх дасгалд 371 оноо авчээ. Ийнхүү монгол бүсгүйчүүд багаараа тивийн аваргын алтан медалийн эзэн болсон байна. Гурван жилийн тэртээ зохиогдсон хийн бууны анхны Азийн АШТ-д манайхан мөн л багаараа тэргүүлсэн билээ.

Гар бууч охид (Ц.Хонгорзул-”Шандас”, Г.Хэрлэнцэцэг, Т.Баярцэцэг-хоёул Үндэсний шигшээ баг) багийн дүнгээр мөнгөн медалийн эзэн боллоо. Урт бууч охид (“Снайпер” клубийн тамирчин У.Саранцацрал, О.Онон, Б.Лхам нар) багаараа 1173 оноогоор мөн мөнгөн медаль зүүв. Урт бууч эрэгтэйчүүдээс ОУХМ Ц.Мөнх-Эрдэнэ хийн урт бууны 10 метрт 592 оноогоор шигшээд шалгарч, наймдугаар байр эзэлсэн байна.
   
Дашрамд дурдахад энэ сарын 9-14-нд Бээжин хотноо Дэлхийн цомын ээлжит шатны тэмцээн болно. Тус тэмцээнд 2008 оны олимпийн эрх авсан гавьяат тамирчин О.Гүндэгмаа, ОУХМ Ц.Мөнхзул, З.Батхуяг нар онч сорих аж.