“Гаалийн шинэчлэл”-ийн ажлын хүрээнд олон улсын стандартын шаардлага хангасан лабораторийн зориулалтын барилгыг ашиглалтад орууллаа.

Гаалийн  төв лабораторийн барилгыг ашиглалтад оруулснаар уул уурхайн экспортын бүтээгдэхүүн болон улсын хилээр нэвтрүүлж байгаа бараанд тавих гаалийн хяналтыг сайжруулах, орчин үеийн өндөр бүтээмжтэй шинжилгээний тоног төхөөрөмжийг суурилуулах, шинжилгээний үр дүнг үнэн зөв тодорхойлох, хөдөлмөр хамгаалал, аюулгүй байдлыг хангах боломж бүрдсэн байна.

Гаалийн шинэчлэлийн хүрээнд АНУ,  Герман, Англи, Япон, Швейцари, Итали, Австри, БНХАУ зэрэг орнуудад үйлдвэрлэгдсэн олон улсад танигдсан Agilent, Thermo scientific, Tanaka, Koehler, Anton Paar, CKIC, Mesdan, Leco, Borgwaldt, Bruker зэрэг брендийн эрдэс түүхий эд, нүүрс, газрын тосны бүтээгдэхүүн, химийн болон мансууруулах, сэтгэцэд нөлөөт бодис, согтууруулах ундаа, тамхи, тамхин бүтээгдэхүүн, ноос ноолуур, малын гаралтай ширхэгт материалын шинжилгээний чиглэлээр орчин үеийн өнөр бүтээмжтэй, автомат, дэвшилтэт технологид суурилсан 19.9 тэрбум төгрөгийн өртөг бүхий 8 шинжилгээний чиглэлийн нийт 164 шинжилгээний тоног төхөөрөмж нийлүүлж байгаагаас 74 тоног төхөөрөмжийг гаалийн төв лабораторид, 90 тоног төхөөрөмжийг гаалийн салбар лабораториудад нийлүүлж, суурилуулан, хэвийн үйл ажиллагаанд оруулахаар ажиллаж байгаа аж.

Гаалийн төв лаборатори 2021 оны 6-р сарын 30 хүртэл БЯМБА гараг бүр 08:30-17:30 цагийн хооронд ажиллаж байна гэж ГЕГ-аас мэдээллээ.

1. Эрдсийн шинжилгээний чиглэл:

Уул уурхай, эрдэс бүтээгдэхүүн шинжлэх 16 тоног төхөөрөмжийг гаалийн  төв лабораторид суурилуулан, ашиглалтад оруулахаар ажиллаж байгаа бөгөөд ингэснээр гаалийн  төв лаборатори нь уул уурхайн экспортын хүдэр баяжмалын үндсэн болон дагалдах элементүүдийн иж бүрэн шинжилгээг шинээр хийх боломж бүрдэх ба энэ нь АМНАТ-ийг тухай бүр үнэн зөв тогтоож, барагдуулах ач холбогдолтой юм.

2. Нүүрсний шинжилгээний чиглэл:

Нүүрсний шинжилгээний зориулалттай 26 тоног төхөөрөмжийг гаалийн  төв лабораторид суурилуулан, ашиглалтад оруулснаар экспортын нүүрсний чанарын иж бүрэн шинжилгээ, хорт агууламжийг тодорхойлох боломж бүрдэж байна. Энэ нь экспортын барааны статистик мэдээ тайланг үнэн зөв гаргахад ач холбогдолтой.

3. Газрын тосны бүтээгдэхүүний шинжилгээний чиглэл:

Газрын тосны бүтээгдэхүүнийг шинжлэх зориулалттай 16 тоног төхөөрөмжийг суурилуулан, ашиглалтад оруулснаар импортоор оруулж буй нефтийн бүтээгдэхүүний чанар, найрлага агууламжийг тодорхойлж, хуурамч бүтээгдэхүүн импортлоход хяналт тавихаас гадна онцгой албан татварыг үнэн зөв ногдуулах боломж бүрдэнэ.

Энэ хүрээнд авто бензиний октан тооны шинжилгээний үр дүнгийн талаарх маргаантай асуудлыг шийдвэрлэх зорилгоор моторын болон шинжилгээний аргаар октан тоо тодорхойлох бүрэн автомат, суурин тоног төхөөрөмжийг нийлүүлж, суурилуулж байна.

4. Химийн болон мансууруулах, сэтгэцэд нөлөөт бодисын шинжилгээний чиглэл:

Химийн хортой болон аюултай бодис, мансууруулах, сэтгэцэд нөлөөт бодисыг шинжлэх зориулалттай орчин үеийн дэвшилтэт технологи бүхий гэрлийн шингээлт болон ойлтын аргад суурилсан, хосолсон 2 нэр төрлийн тоног төхөөрөмжийг суурилуулан, ашиглалтад оруулснаар хар тамхи, мансууруулах бодисыг таньж илрүүлэх, МУ-ын хилээр нэвтрүүлэхийг хориглосон болон хязгаарласан бараа бүтээгдэхүүний шинжилгээний нэр төрөл, хүрээг өргөтгөж байна.

5. Согтууруулах ундаа болон тамхины шинжилгээний чиглэл:

Согтууруулах ундаа болон тамхи, тамхин бүтээгдэхүүн шинжлэх зориулалттай 8 төхөөрөмжийг суурилуулан, ашиглалтад оруулснаар онцгой албан татвартай дээрх бүтээгдэхүүнүүдийн шинжилгээнд зарцуулах хугацааг 2 дахин бууруулж, шинжилгээний үзүүлэлтүүдийн нэр төрлийг нэмэгдүүлж, гадаад худалдааг хөнгөвчилж байна.

6. Ноос ноолуур малын гаралтай ширхэгт материалын шинжилгээний чиглэл:

Ноос ноолуур малын гаралтай ширхэгт материал шинжлэх зориулалттай 6 төхөөрөмжийг Итали, Австри зэрэг орнуудаас нийлүүлж, суурилуулснаар экспорт, импортын ноос ноолуур, нэхмэл сүлжмэл бүтээгдэхүүнийг чанар, боловсруулалтын түвшнийг нарийвчлан тогтоох, шинжилгээ хийх орчныг бүрдүүлсэн.

Үүнээс гадна гаалийн төв болон салбар лабораториудад шинжилгээ хийх орчныг бүрдүүлэх ажлын хүрээнд 8251 нэр төрлийн 1.1 тэрбум төгрөгийн өртөг бүхий лабораторийн зориулалттай тавилга, хэмжих болон туслах хэрэгсэл, шил сав, урвалж бодисыг нийлүүлж, шинжилгээний бэлтгэл ажлыг хангасан.

Цаашид гаалийн лабораторийг уул уурхай, газрын тосны бүтээгдэхүүний шинжилгээний чиглэлээр олон улсын итгэмжлэлд хамруулах зорилт тавин ажиллаж байна