Туул гол руу шугам хоолойгоор их хэмжээний бохир ус нийлүүлж буй бичлэгийг энэ сарын 11-ний бямба гарагт нэг иргэн нийгмийн сүлжээнд тавьжээ. Бохир усыг ямар зөвшөөрлөөр, хаанаас нийлүүлж байгааг Туул голын сав газрын захиргааны Хяналт, шалгалт хариуцсан мэргэжилтэн Б.Бат-Эрдэнээс тодрууллаа.

-“Мишээл экспо”-гийн хашаан дотор шугам хоолойгоор Туул гол руу өмхий үнэртэй, бохир ус нийлүүлж байна. Та бүхэн усыг хаанаас нийлүүлж байгааг тогтоосон уу?
-Би иргэдийн мэдээллийн мөрөөр өнгөрсөн бямба гарагт газар дээр нь очиж танилцсан. “Мишээл экспо”-гоос барилгын суурь тавихад хөрсний ус гарсан учир өнгөрсөн жил ус шахан зайлуулах дүгнэлт гаргуулж, холбогдох байгууллагаас зөвшөөрөл авсан. Сая тус компанийн барилгын инженертэй уулзаж, Туул гол руу нийлүүлж байгаа ус байгальд нийлүүлэх стандарт шаардлага хангасан эсэх лабораторийн шинжилгээг дахин хийлгэх албан ёсны шаардлага тавилаа. Тус компани өнгөрсөн жил ийм шинжилгээ хийлгэж, байгаль орчин л халгүй гэсэн дүгнэлт гарсан тул хөрсний усаа Туул гол руу нийлүүлж байсан юм.  



-Туул руу нийлүүлж буй ус өмхий үнэртэй байсан гэж иргэд мэдээлсэн. Хөрсний ус өмхий үнэртэй байдаг гэж үү?
-Хэсэг хугацаанд өнгөтэй байсныг үгүйсгэхгүй. Намайг очиход өнгөгүй, үнэргүй байсан. 

-Хөрсний усыг шавхан зайлуулах дүгнэлтийг хаанаас гаргадаг вэ?
-Шавхан зайлуулах усны хэмжээнээс хамаарна. Тухайлбал, 0-50 шоо метр ус бол аймаг, нийслэлийн Байгаль орчны газраас, 50-100 шоо метр бол Сав газрын захиргаанаас, 100 шоо метрээс дээш хэмжээний ус зайлуулах бол Усны газраас ус шахан зайлуулах дүгнэлт гаргана. Дүгнэлт гарсны дараа гэрээ байгуулж, зөвшөөрөд авах юм.  

Нийслэлд бол Нийслэлийн байгаль орчны газар, Туул голын сав газрын захиргаа болон Усны газрын дүгнэлтэд үндэслэн шахан зайлуулах зөвшөөрөл авна. "Мишээл экспо"-гийн хувьд энэ жил дахин ус шахан зайлуулах гэрээ байгуулж, дүгнэлт гаргуулах ёстой гэв.

Туул голын цөн түрж, урсаж эхэллээ. /2021.04.11-ний өдөр /













Фото эх сурвалж: Туул голын сав газрын захиргаа