Төрийн өмчийн их сургуулиудын харьяа ерөнхий боловсролын ахлах сургуулиудын удирдлага, ажилтан, багш нарын судалгаа шинжилгээний онол, арга зүйн чадварыг сайжруулах, хөгжүүлэх зорилго бүхий эрдэм шинжилгээний хурлыг хоёр дахь удаагаа зохион байгууллаа. 

Энэ удаагийн хурлыг өчигдөр /2023.11.03/ АШУҮИС-ийн харьяа ерөнхий боловсролын сургууль “Сургалтын байгууллагын менежментийг сайжруулах арга зам” сэдвийн хүрээнд амжилттай зохион байгуулав. Хуралд МУБИС-ийн Боловсрол судлалын сургуулийн багш доктор (Ph.D), дэд профессор Р.Намжилдагва, МУИС-ийн Антропологийн тэнхимийн багш, доктор (Ph.D) Б.Жаргалан нар зочин илтгэгчээр оролцож, сонирхолтой илтгэлүүд хэлэлцүүлэв.

Эрдэм шинжилгээний хуралд оролцогчид АШУҮИС– ийн сургалтын орчинтой танилцан, сургалтын технологийн шинэчлэлийн хүрээнд шинээр байгуулсан кабинет, лаборатори, номын сан, цайны газар бүхий орчин үеийн сургалтын байгууллагын шаардлага, чиглэлд нийцэхүйц шийдэл бүхий сургалтын орчин бүрдүүлсэн санаа авахуйц сайн туршлага болсныг онцолсон байна.

Сурган хүмүүжүүлэх ухаан, боловсрол судлал, сэтгэл судлал, монгол хэл, үндэсний бичиг, түүх, нийгмийн ухаан, математик, биологи, англи хэлний  боловсролын сургалтын онол, арга зүйн судалгаа, инноваци, бүрэн дунд түвшний хүүхдийн хөгжил, төлөвшил, багшийн хөгжлийн судалгаа зэрэг боловсролын тулгамдсан асуудлуудын хүрээнд эрдэмтэн судлаач, профессор багш, суралцагчдын шинжлэх ухааны мэдлэг, чадвар, сэтгэлгээг хөгжүүлэх, эрдэм шинжилгээний ажлын үр дүнг практикт нэвтрүүлэх, шинэ мэдлэг, технологи, арга зүй, үнэлгээ, туршлагыг түгээн дэлгэрүүлэх, сурталчлахад энэхүү эрдэм шинжилгээний хурлын зорилго чиглэгдэж, үндсэн хуралдаанаар хэлэлцүүлсэн 10 илтгэлд холбогдох асуулт, хариулт явагдаж, харилцан үзэл бодлоо илэрхийллээ.

АШУҮИС-ийн Ерөнхий боловсролын ахлах сургуулийн захирал, Доктор (Ph.D), Дэд профессор Ц.Түвшинжаргал “Их сургуулийн дэргэдэх лицей сургуулиудын удирдлага, багш, ажилтнууд сургалт болоод эрдэм судлалын ажлын чанар үр дүнг дээшлүүлэх чиглэлд нэгдэж хамтарч ажиллах нь үр дүнтэй. Сургалтын орчин үеийн  технологийн шийдлийг эрэлхийлсэн сургалтын сайн орчин бүрдүүлэн ажиллах, бусад сургуулийн удирдлага, багш нарт сургуулийн үүд хаалга үргэлж нээлттэй байж, сайн туршлагыг хуваалцах, түгээн дэлгэрүүлэх талаар хамтран ажиллах саналтай байгааг онцлов.

Тэрбээр хурлын ач холбогдлыг дүгнэн, судалгааны үр дүнг танилцуулсан судлаач багш нарт Батламж  гардуулснаар эрдэм шинжилгээний хурлын үйл ажиллагаа өндөрлөлөө. Дараагийн хурлыг МУИС-ийн харьяа “Байгаль–Эх лицей” ерөнхий боловсролын ахлах сургуулийн хамт олон зохион байгуулахаар тогтов.