Засгийн газрын ээлжит хуралдаан үргэлжилж байна. Өнөөдрийн хуралдаанаар:

• Худалдаа, аж үйлдвэрийн танхимын тухай хуулийн шинэчилсэн найруулгын төсөл,
• “Их өгөгдлийн сан байгуулах тухай” Засгийн газрын тогтоолын төсөл,
• Төрийн үйлчилгээний нэгдсэн систем ашиглан төлбөр тооцоо хийх боломж, өнөөгийн байдлын талаар, 
• Хууль тогтоомж, тогтоол шийдвэрийн хэрэгжилтийн 2023 оны хагас жилийн хяналт-шинжилгээ, үнэлгээний талаар
• НҮБ-ын Цөлжилттэй тэмцэх суурь конвенцын талуудын 17 дугаар бага хурлын бэлтгэл ажлын талаар (COP17) зэрэг 16 асуудал хэлэлцэх болон танилцахаар төлөвлөжээ.  

Засгийн газрын хуралдааны шийдвэрүүдийг өнөөдөр мэдээлнэ.  

ЗГХЭГ-ын дарга Д.Амарбаясгалан, Ерөнхий сайд өнгөрсөн долоо хоногт Засгийн газрын гишүүдийн хамт МҮХАҮТ-ын шинэ удирдлагууд болон бизнес эрхлэгчидтай зөвлөлдөх уулзалт хийсэн. Бизнесийн орчныг дэмжих, хууль эрх зүйн өөрчлөлт оруулах зэргээр санал солилцсоны дагуу эрх зүйн орчныг боловсронгуй болгох зорилгоор таван хуульд өөрчлөлт оруулахаар ажиллаж байна. Худалдаа, аж үйлдвэрийн танхимын тухай хуулийн шинэчилсэн найруулгын төсөлд:

МҮХАҮТ-ын бүтэц нь 21 аймаг, Улаанбаатар хотод танхимын салбар байгуулагдаж, бизнес эрхлэгчдийг нийтэд нь төлөөлдөг бүтцээр явж ирсэн. Энэ удаагийн өөрчлөлтөөр танхимыг бүрдүүлж байгаа салбар танхимууд буюу мэргэжлийн холбоод нь салбар бүрийг төлөөлдөг болох зарчим руу шилжиж байна. Уул уурхайн бизнес эрхлэгчид нэгдэж, уул уурхайн бизнес эрхлэгчдийн салбар танхимыг МҮХАҮТ-ын дотор байгуулж болно. Тэдгээр мэргэжлийн холбоод нь нэгдэж МҮХАҮТ-ыг бий болгодог загвар руу орж байгаа юм. Энэхүү загвар нь ХБНГУ, Турк, БНСУ зэрэг улсад туршигдсан, идэвхтэй үйл ажиллагаагаараа дамжуулан төрийн зарим чиг үүргийг хувийн хэвшлийнхэн бүрдүүлэх боломжийг нээдэг давуу талтай.

МҮХАҮТ-ийн ерөнхийлөгч Д.Энхтүвшин, Өнгөрсөн долоо хоногт Ерөнхий сайд Засгийн газрын гишүүдийн хамт бүрэн бүрэлдэхүүнээрээ бизнес эрхлэгчдийн төлөөлөлтэй уулзсан. Төрөөс бизнес эрхлэгчдийг дэмжих бодлого барьдаг ч цөөн хэдэн аж ахуйн нэгжид хамаатай шийдвэр болдог гэх шүүмжлэл бий.
Төр хувийн хэвшлийн хамтын ажиллагааны хүрээнд хувийн хэвшлийн төлөөлөх чадварыг нэмэгдүүлэхийн тулд Худалдаа, аж үйлдвэрийн танхимын тухай хуулийн шинэчилсэн найруулгын төслийг яаралтай хэлэлцээд, УИХ-д өргөн мэдүүлэх гэж байна. Хуулийн төсөлд:

• Татварын орчин
• Зээлийн олдоц, өртөг
• Мэргэжлийн  ажиллах хүчний нөөц
• Авлигатай холбоотой асуудлууд
• Төр хувийн хэвшлийнхний хийж чадах ажлыг хийдэг зэрэг асуудлыг хуулиар зохицуулах боломж гарч байна.