• 15 дахь удаагийн Монгол-Энэтхэгийн хамтарсан цэргийн сургуулилт Монгол Улсад зохиогдож байна
• Энэтхэгийн Элчин сайд Монгол Улсад түргэн тусламжийн машин, тусгай зориулалтын өвлийн хувцас өгөв
• Цэргүүд ур чадварыг дээшлүүлэх зорилготой олон төрлийн сургалтад оролцоно

“Нүүдэлчин заан” 15 дахь удаагийн хоёр талын хамтарсан цэргийн сургуулилт Монгол Улсад долоодугаар сарын 17-31-ний өдрүүдэд болж байна. Монгол-Энэтхэгийн батлан хамгаалах салбарын хамтын ажиллагааг улам өргөжүүлэх зорилготой тус сургуулилтыг Монгол Улсын Батлан хамгаалахын сайд, генерал Г.Сайханбаяр болон Энэтхэгийн Элчин сайд М.П.Сингх нар нээлээ.

Тус сургуулилтын нээлтийн үеэр Элчин сайд М.П.Сингх Энэтхэгийн Батлан ​​хамгаалахын сайдын нэрийн өмнөөс Монгол Улсын Зэвсэгт Хүчинд Энэтхэг улсад үйлдвэрлэсэн түргэн тусламжийн хоёр автомашин, өндөр уулын тусгай зориулалтын 200 өвлийн хувцас гардуулан өгчээ.

Тэрбээр тус сургуулилтаар дамжин Монгол Улсын батлан ​​хамгаалах, Энэтхэгийн зэвсэгт хүчний цаашдын хамтын ажиллагаанд чухал хувь нэмэр оруулна гэдэгт итгэлтэй байгаагаа илэрхийлсэн. Мөн батлан ​​хамгаалах салбарын хамтын ажиллагааг нэмэгдүүлэх замаар “стратегийн түншлэл”-ийг ахиулахад ахиц дэвшил гарч байгааг сайшаав.

“Нүүдэлчин заан” цэргийн сургуулилтад Монголын Улсын Зэвсэгт Хүчний 70 орчим цэрэг, Жамму-Кашмирын явган цэргийн ангийн 43 гишүүн оролцжээ. Сургуулилтаар Монгол, Энэтхэгийн цэргүүд тэсвэр хатуужлын бэлтгэл, рефлекс буудлага, хаданд авиралт, багийн ажиллагаа зэрэг цэргүүдийн ур чадварыг дээшлүүлэх зорилготой сургалтуудад хамрагдах аж. Мөн уулархаг бүс дэх терроризмын эсрэг бэлтгэл хийнэ.

Хоёр улсын хамтарсан, туршлага солилцох зорилготой цэргийн сургуулилт нь тогтмол хэрэгждэг бөгөөд сүүлд 2019 оны 10 дугаар сард Энэтхэгийн Баклох хотын тусгай хүчний цэргийн сургуульд зохиогдсон.

Сүүлийн саруудад хоёр улсын батлан ​​хамгаалах салбарын хамтын ажиллагаа мэдэгдэхүйц өргөжин хөгжиж байгаа нь Энэтхэгийн Батлан ​​хамгаалахын сайд 2022 оны есдүгээр сард Монгол Улсад хийсэн анхны айлчлалын үеэр Үндэсний батлан​​ хамгаалахын их сургуулийн Кибер аюулгүй байдлын сургалтын төвийн нээлтийг хийсэнтэй холбоотой.

Эх сурвалж: Энэтхэгийн ЭСЯ