Жүжигчин, дуучин Э.Мөнхтөр (A-capella хамтлагийн Төрөө) “Хайрын рекорд”, “Амьдралын амт” уран сайхны кинонуудын гол дүрд тоглон хүүхэд залуустаа дэлгэцийн уран бүтээлээрээ бэлэг барьж байсан нь саяхан. Мөн “Амьдралын амт” киноны дуу болох “Хайрын дуу”-г дуучин Маралжингоотой хамтран дуулж, хүүхэд залуусын сонсох дуртай дууны нэг болж чадсан.

Тэгвэл өнөөдөр Дуучин Төрөө, Маралжингоо хоёр хамтран дахин нэг шинэ дуу бүтээж, үзэгч, сонсогчиддоо хүргэхээр бэлэн болсон байна. Гэхдээ энэ удаагийн дуундаа үзэгч, сонсогчдынхоо санал бодлыг тусгах, өвсөр үеийнхэнтэйгээ хамтарсан дуу гаргах бодолтой байгаа бөгөөд сонсогчид, хүүхэд залуучуудыг дууны нэрийг өгөхийг хүсжээ.

Тэд энэхүү дуугаа зохиохдоо зүгээр нэг сайхан аялгуутай, сайхан үгтэй дуу хайрын дуу зохиохоосоо илүү сонсогч, хүүхэд залуус, өсвөр үеийнхэнд энэ дуугаараа хэд хэдэн мессежийг хүргэх зорилготой гэнэ.

Дуучин Төрөө хэлэхдээ: Сүүлийн үед дөнгөж амьдралын гараагаа эхэлж байгаа хүүхэд залуус, өсвөр үеийнхний дунд хүсээгүй жирэмслэлт, үр хөндөлт, БЗХӨ гэх мэт тулгамдсан асуудлууд их байна. Эдгээр асуудлууд юунаас үүдэлтэй вэ гэхээр хүүхэд, залуус, өсвөр үеийнхэн маань эрэгтэй, эмэгтэй хүний Нөхөн үржихүйн эрүүл мэндийн талаарх мэдлэг бага байгаагаас үүдэлтэй. Хэдийгээр энэ талаар мэдэж байсан ч түүнийгээ илэрхийлэх хэрхэн зөв илэрхийлэх вэ гэдгээ мэдэхгүйгээс амьдралынхаа анхны алхамыг буруу хийж байна. Тиймээс энэ дуугаараа зөв мэдлэг, зөв харилцаа, зөв алхмыг уриалсан бөгөөд дууны үг болон клипийг үзээд та бүхэн өөрсдийн сэтгэгдэлээ, мөн ямар нэр энэ дуунд тохирох вэ гэдгээ бидэнд илгээгээрэй.

Дуучин Маралжингоо: Би өсвөр үеийнхний нэгэн адил амьдралынхаа алхамыг зөв хийхийг хичээж явна. Тиймээс хүүхэд залуус, өсвөр үеийнхэндээ хандан хэлэхэд амьдралдаа хариуцлагатай хандаж, зөв мэдлэгтэй байцгаая гэж хэлмээр байна. Мөн бидний дууны нэрний уралдаанд идэвхтэй оролцоорой хэмээн уриалж байна.

Уралдааны талаар 5000-8088 дугаараас та бүхэн лавлаж болох нь ээ.

Дууны нэрний уралдаанд тэргүүн байр эзэлсэн болон саналаа өгч оролцсон бүх хүн хоёрдугаар сарын 8 нд болох шагнал гардуулах ажиллагаанд уригдах юм байна. Та бүхэнд дууны үгийг хүргэе.

Хайр- Ямар ч газар хэн ч харсан албан ёсны зүрхэн логотой
Энэ хайр- Янз бүрийн өнгө будаг хэлбэр дүрстэй хэв маягтай
Зөв хайр- Хоёр хүний дунд хэрэглэгдэх дүрэм журамтай
Хайр- Би өөртөө бас чамд хайртай гэдэг үндсэн уриатай

Хайр гэдэг Хайр гэдэг Хайр гэдэг гэгээхэн бас эмзэгхэн
Тиймээс зөв мэдлэгтэй байх хэрэгтэй
Хайр гэдэг Хайр гэдэг Хайр гэдэг халуухан бас гэнэхэн
Тиймээс зөв алхам чиний ирээдүй

Дахилт: Хэрэв чи хэн нэгнийг насан туршдаа хайрлахыг хүсвэл
Хэрэглэх зааврыг нь сонсож бас сайн сурсан байх хэрэгтэй
Хэрэв чи энэ хайраа үүрдийнх гэж шийдсэн бол
Өөрт байгаа бүхнээ түүндээ харамгүй зориулах хэрэгтэй

Хайр- Тансаг маягийн тохилог дулаан өөрийн гэсэн зүрхэн House-тай
Энэ хайр- Төрөл бүрийн амт чанар үзэмж загвар ёс жаягтай
Нэг хайр- Гурав буюу түүнээс дээш хүн хэрэглэх хориотой
Хайр- Би өөртөө бас чамд хайртай гэдэг үндсэн уриатай

Хайр анхны Хайр анхны Хайр анхны харцаар дурлаж бас татагдаж
Зөв харилцаагаар эхэлнэ.
Зөв алхам зөв мэдлэг зөв харилцаа гэдэг
Үнэнч хайрын сайхан амьдралын эхлэл билээ.

Дахилт: Хэрэв чи хэн нэгнийг насан туршдаа хайрлахыг хүсвэл
Хэрэглэх зааврыг нь сонсож бас сайн сурсан байх хэрэгтэй
Хэрэв чи энэ хайраа үүрдийнх гэж шийдсэн бол
Өөрт байгаа бүхнээ түүндээ харамгүй зориулах хэрэгтэй

М.Жаргал