Шинэ сурын талбайг ирэх долдугаар сарын 5-н гэхэд одоогийн сурын талбайн баруун талд барихаар боллоо. Ингэснээр олон жил яригдсан сурын талбай, байрны асуудал энэ жилээр дуусгавар болох нь.1000 хүний багтаамжтай энэ байрыг барихад 330 сая төгрөг зарцуулах болсон байна.Сурын талбайн хуучин газарт хотын хэсэгчилсэн Ерөнхий төлөвлөгөөний дагуу авто зам барихаар тусгасан учир ийм шийд гаргажээ. Харин сур харвааны одоогийн байрыг шинэчлэн шагайн харвааны байр болгох юм. Үндэсний их баяр наадмыг зохион байгуулах хорооны өнөөдрийн хурлаар мөн Морь барианы газар, замын талаар хэлэлцлээ. Баруун чиглэлийн зам барих тендерт шалгарсан “Очир төв” компани ажлаа хийхгүй байгаа тухай шуугиан дэгдээд байгаа. 22-ын товчооноос Цагаан хөтөл хүртэл 21 метр өргөн, 4 урсгалтай замыг 7 дугаар сарын 5-н гэхэд тавьж дуусна гэж “Очир төв” компанийн захирал амалсан байна. Мөн төв замаас хойш 3,2 километр автозамыг  380 сая төгрөгөөр тавих болжээ.

Баруун чиглэлд зам тавьж байгаа учир автомашинууд морь уралддаг замаар явж хүндрэл учруулж байгаа. Иймээс энэ замаар бус туслах замаар зорчиж байхыг жолооч нараас хүсч байгаа ажээ.

Б.Тэлмэн