Хошин урлагийн "Шинэ үе" продакшн шинэ уран бүтээлээ үзэгчиддээ хүргэхээр догдолж буйтай таарлаа. Өнгөрсөн зунжингаа кино зураг авалт гэж ийшээ тийшээ гүйсэн уран бүтээлчид маань одоо л нэг амсхийж байх шиг. Тэд удахгүй "Дурласнаа бүү тоол" нэртэй киногоо үзэгчиддээ хүргэхээр зэхэж байна. Тус кинонд жүжигчин Д.Хүрэлхүү, дуучин Ч.Ану нар "Шинэ үе" продакшны жүжигчидтэй хамтран тоглосон байна. Ингээд тус продакшны уран бүтээлчдийн сонин сайхнаас хүргэе.

Бооёогийн бухимдал
"Шинэ үе" продакшны тулгын чулууг тавьсан хүн бол мэдээж жүжигчин Н.Ариунболд. Тэрбээр сүүлийн үед нэгэн зүйлд ихэд бухимдалтай алхах болов. Энэ нь хошин урлагийг хүмүүс хошин шог гэж буруу ярьдаг болсонтой холбоотой юм. Мөн түүний бас нэгэн содон үзэл нь хоёр эхнэртэй байхыг ихэд дэмждэг. Гэхдээ өөрөө хоёр эхнэргүй. Өдгөө хоёр охины аав болсон уран бүтээлч маань шүлэг бас оролдоно оо. Түүний тэрлэсэн уран бүтээлээс хит дуу хүртэл төрөөд амжсаныг та бүхэн мэднэ биз. Мөн жүжигчин Бооёо ажлын өрөөнийхөө үүдэнд жад, сэлэм, бамбай зүүжээ. XIII зууны үеийг санагдуулам энэ нь ямар нэгэн муу, муухай хар бараан зүйлийг нэвтрүүлэхгүй гэсэн утгатай гэсэн.

Лхагваа яаж дутахав
"Шинэ-үе"-ийнх ч юм шиг, Эрхэм элчийнх ч юм шиг учир нь олддоггүй жүжигчин Ч.Лхагвасүрэн саяхан хилийн дээс алхаад ирсэн гэнэ. Учир нь "Шинэ үе" продакшнд нэг тоглолт хийснийхээ дараа нэг уран бүтээлчээ гадаадад амраадаг уламжлал тогтжээ. Энэ боломж энэ удаа түүнд ноогдсон гэсэн. Жүжигчин Лхагвагийн хувьд сүүлийн үед сураг тасарсан уран бүтээлчдийн тоонд зүй ёсоор багтаад байгаа. Гэхдээ энэ нь дэлгэцийн урлагтай холбоотой. Кино урлагт олон уран бүтээл хүч төрөн орж ирж буй. Үүнд хувь нэмрээ оруулахаас жүжигчин Лхагва яаж дутахав. Түүний тоглосон, найруулсан шинэхэн уран бүтээл кино театруудад дугаарласаар.

Аси нас тогтжээ
Удахгүй нээлтээ хийх "Дурласнаа бүү тоол" кино жүжигчин Аси буюу Алтансүхийн найруулсан анхны бүтээл юм. Тэрбээр жүжиглэхээс гадна найруулагчийн мэдрэмжтэй гэдгээ үзэгчиддээ харуулахыг зорьжээ. Мөн "Нас тогтож байгаа юм байлгүй, кино найруулж, уран бүтээлдээ илүү их ухаантай хандах хүсэлтэй болсон" гэдгээ нуусангүй. Мөн түүнийг бор дарсанд толгойгоо мэдүүлэх болсон талаар нэг хэсэг шуугисан. Түүгээр ч барахгүй архины эмчилгээ хийлгэж байгаа талаар мэдээлж байсан. Үүнийг ч тэрбээр няцаадаггүй юм билээ.

Н.Ундармаа л алга
Хошин урлагийн цөөн хэдэн эмэгтэй уран бүтээлчийн нэг болох жүжигчин Н.Ундармаа сүүлийн үед нэг л нам гүм амьдраад байх шиг. Тоглолтынхоо хэдэн номерт гарсан шиг л цагийг өнгөрөөж байгаа талаар зарим үзэгчид шүүмжлэлтэй хандах болсон. Энэ нь "Би нөхрөөсөө өөр хүнд дурлаж чадахгүй" хэмээн зарлаж байсан уран бүтээлч маань сайн гэрийн эзэгтэй болсонтой холбоотой байж болох юм. Ямартай ч жүжигчид кино урлаг, драм, тэр ч байтугай рок поп ертөнцөд хөл тавих болсон энэ цаг үед Н.Ундармаа л алга. Гэхдээ тэрбээр зүгээр суугаагүй. Бизнесийн ертөнцөд хөл тавьсан юм билээ.

Т.Батсайхан