Улирал бүр нь Rottentomatoes-ын 90 хувиас дээш үнэлгээтэй гарсан “Хаадын тоглоом” цувралыг СКАЙмедиа корпораци албан ёсны эрхтэйгээр үзэгчдэд хүргэж эхэлсэн билээ.

Харин өчигдөр энэ үйл явдлыг тохиолдуулан Улсын Дуурь Бүжгийн Эрдмийн Театрт хамгийн сонирхолтой, онцгой ангийг нь монгол дуу оруулгатайгаар, симфони найрал хөгжмийн тоглолтын хамт үзэгчдэд толилуулав.

Кино урлаг угаас хөгжим, дүрс хоёрын нийлбэр. Энэ хоёр хоршиж байж л үзэгчдийг дэлгэцийн өмнө уядаг учиртай. Тэгвэл киноны хөгжмийг таны өмнө суугаа хөгжимчид шууд эгшиглүүлнэ гээд төсөөл дөө.

Өчигдөр УДБЭТ-т толилуулсан анги нь “Хаадын тоглоом” цувралын зургадугаар улирлын сүүлийн анги байсан бөгөөд олон зүйлийн учиг тайлагддаг төдийгүй хамгийн их хөгжим орсон ангиудын нэг аж.

Киног МҮОНРТ-ийн чадварлаг уран бүтээлчид орчуулж, дуу оруулсан бөгөөд киноны турш эгшиглэх 17 хөгжмийг Улсын филармонийн удирдаач, төгөлдөр хуурч Б.Анараар удирдуулсан найрал хөгжимчид, найрал дуучид шууд тоглож сонирхуулсан юм.

“Ап мюзик продакшн”-ын продюсер Н.Халиун:

Анх удаа симфони найрал хөгжимтэйгөөр кино үзлээ. Бид бодит дуугаралт гэж ярьдаг шүү дээ. Үнэхээр хөгжим гэдэг киноны амин сүнс гэдгийг батлан харуулсан явдал гэж үзэж байна.

Ялангуяа киноны хөгжимд ингэж өндөр ач холбогдол өгч буй нь хөгжмийн салбарынхны хувьд том ололт юм. Дэлхийн шилдэг контент Монголд албан ёсны эрхтэйгээр орж ирж буй том үйл явдал.

Үүнийг дагаад Монголын хөгжимчдийн ур чадвар, хөгжмийн удирдаачийн ур чадвар, тоглосон байдал нь үнэхээр өндөр хэмжээнд байгааг харах сайхан байлаа.

Дүрс, хөгжим хоёр нийлж, нэгэн цул болж байж л хүнд хүрдэг шүү дээ. Тэгэхээр өнөөдөр СКАЙмедиа корпорацийн энэхүү үзвэрийг тун гайхалтай л гэж дүгнэнэ.

“Хаадын тоглоом” цувралыг албан ёсны эрхтэйгээр оруулж ирэхээр болсон цагаас хойш СКАЙмедиа корпорацийн хамт олон шууд симфони найрал хөгжимтэй хослуулсан үзвэр гаргахаар ажиллаж эхэлжээ.

Орчуулга болон дуу оруулга хийхэд бараг сар шахам хугацааг зарцуулсан бөгөөд хамгийн сайнаар хүргэхийг зорьж, зорьсондоо ч хүрсэн байна.

Монгол дуу оруулга, симфони найрал хөгжимтэй үзвэрийн дууны найруулга дээр ажилласан СКАЙмедиа корпорацийн контент редактор А.Төгөлдөр:

Бидний өнөөдөр үзсэн 60 дугаар ангийн хувьд хамгийн их хөгжимтэй төдийгүй, хамгийн чухал зүйлсийн тайлал хэсэг гардаг. Тэгэхээр энэ ангийн хөгжмийг нь найрал хөгжимчид шууд тоглож хүмүүст хүргэвэл тохиромжтой юм байна гэж үзээд бэлтгэл ажилдаа орсон.

Бүтэн ам барих учраас орчуулга нь маш сайн байх ёстой. Киног орчуулахад бараг сар гаруй хугацаа зарцуулж, зөвхөн дуу оруулга хийхэд л тасралтгүй гурван өдөр ажилласан байна. Мэдээж хэрэг 60 дугаар анги гэлтгүй “Хаадын тоглоом” цуврал бол яах аргагүй заавал үзэх киноны жагсаалтад байх ёстой бүтээл.

СКАЙмедиа корпорацийн хувьд HBO сувагтай таван жилийн турш хамтран ажиллаж байгаа бөгөөд энэ жилээс “HBO OD” буюу хэрэглэгч хүссэн үедээ контент хүлээн авах үйлчилгээг албан ёсны эрхтэйгээр нэвтрүүлж байна.

Харин та зургадугаар бүлгийн төгсгөлийн ангийг симфони найрал хөгжимтэй хослуулсан үзвэрийг доорх бичлэгээс бүрэн эхээр нь үзээрэй.