Бүгд Найрамдах Хятад Ард Улс байгуулагдсаны 60 жилийн түүхт ойг тохиолдуулан Монгол Улсын Ерөнхийлөгч БНХАУ-ын дарга Ху Жин Таогоор дамжуулан тус улсын  ард түмэнд баярын цахилгаан утас илгээснийг та бүхэндээ хүргэж байна.

“Эрхэмсэг ноён Дарга аа,

Бүгд Найрамдах Хятад Ард Улс байгуулагдсаны 60 жилийн түүхт ойн баярыг тохиолдуулан монголын ард түмний нэрийн өмнөөс болон хувиасаа Танд, Танаар уламжлан найрсаг хятадын ард түмэнд чин сэтгэлийн халуун баяр хүргэе.

Өнгөрсөн жаранд хятадын ард түмэн төр засгийнхаа удирдлагын дор  улс орноо хөгжүүлэх бүтээн байгуулалтын үйлсдээ үлэмж их амжилт гаргаж, БНХАУ улам бүр урагшлан хөгжиж, дэлхийн хамгийн томоохон чадавхитай эдийн засаг бүхий гүрэн болон хувирч нийгмийн амьдралын бүх салбарт бахдам сайхан амжилт олж байгаа нь бахархалтай хэрэг. БНХАУ-ын нийгэм, эдийн засгийн бүтээн байгуулалтын ололт амжилт, ялангуяа дэлхийн санхүү-эдийн засгийн хямралыг даван туулахад оруулж буй бодитой хувь нэмэр нь дэлхий нийт, бүс нутаг, хөрш зэргэлдээ орнууд, түүний дотор манай орны хувьд таатай нөлөө үзүүлж байгааг энд онцлон тэмдэглэхийг хүсч байна.

Эрхэмсэг ноён Дарга Таны 2003 онд Монгол Улсад хийсэн төрийн айлчлалын үеэр тохиролцсоны дагуу Монгол Улс, БНХАУ-ын сайн хөршийн харилцан итгэсэн түншлэлийн харилцаа улс төр, эдийн засаг, соёл, боловсрол, эрүүл мэнд, батлан хамгаалах, хүмүүнлэгийн зэрэг бүхий л салбарт шинэ агуулга хэлбэрээр баяжин улам өргөжин хөгжиж байгаад сэтгэл ханамжтай байна.

Удахгүй, ирэх 10 дугаар сарын 16-ны өдөр Монгол Улс, БНХАУ-ын хооронд дипломат харилцаа тогтоосны 60 жилийн ой тохионо. Монгол, Хятадын бүх талын харилцаа, хамтын ажиллагааг цаашид улам бүр өрнүүлэн хөгжүүлэхийн төлөө  ариун үйлсэд миний бие Эрхэм хүндэт Дарга Тантай нягт хамтран ажиллах болно.

Эрхэм хүндэт Дарга Танд эрүүл энх, сайн сайхан, найрамдалт хятадын ард түмэнд хөгжил цэцэглэлийг хүсэн ерөөе” гэжээ.

Мөн Гадаад харилцааны сайд С.Батболд БНХАУ-ын Гадаад хэргийн сайдад баяр хүргэн, мэндчилгээ дэвшүүлжээ.