Шинэ оны босгон дээр манай улсын харилцаа холбооны салбарт нэгэн тэмдэглүүштэй үйл явдал тохиож байна. Монгол-Солонгосын хөрөнгө оруулалттайгаар 1999 онд үйл ажиллагаагаа эхэлсэн үүрэн холбооны хоёр дахь оператор Скайтел өнөөдөр Монголын хөрөнгө оруулалттай компани боллоо. Ингэснээр манай улсын бизнесийн томоохон байгууллага, мэдээлэл, харилцаа холбооны технологийн салбарт тэргүүлэгчдийн нэг Монголчуудын өмчлөлд шилжлээ.  

11 жилийн өмнө анх үйл ажиллагаагаа эхэлсэн уг компани өдгөө манай орны өнцөг булан бүрт суугаа хагас сая гаруй хэрэглэгчдэдээ хамгийн сүүлийн үеийн дэвшилтэт технологийг ашиглан үүрэн холбоо, өндөр хурдны хөдөлгөөнт интернэт, мобайл ТВ, интернэт утас зэрэг мэдээлэл, холбооны цогц үйлчилгээг хүргэдэг, мэдээлэл, харилцаа холбоо, нийгэм, соёл, спортын салбарт томоохон хөрөнгө оруулагч Монгол Улсын ШИЛДЭГ аж ахуйн нэгжийн нэг болж чадсан юм.

Энэ бүхнийг дэлхийд тэргүүлэх технологийг ашиглах ур ухаан, мэдлэг чадвар эзэмшсэн Монгол инженер, Монгол менежмент, Монгол залуус бий болгосон юм.

Ийнхүү Скайтел компани үндэсний хөрөнгө оруулалттай болсноор тус компанийн мэдээлэл, харилцаа холбооны технологийн болон бусад салбарт оруулж буй хөрөнгө оруулалт, инженер, техникийн ажиллагсдын мэдлэг, ур чадвар, ашиг орлого нь Монгол Улсын сайн сайхны төлөө зориулагдах нөхцөл бүрдэж байгаа юм.

Бид өнгөрсөн хугацаанд олсон амжилтаа бататган дэлхийн жишигт нийцсэн тэргүүний технологи, найдвартай сүлжээ, хэрэглэгчдэд дотно чанартай үйлчилгээг хэрэглэгчдэдээ хүргэсээр байх болно.

Сэтгэл тэнүүн итгэл дүүрэн амьдрах сайхан монгол орноо хамтдаа хөгжүүлцгээе!

Монголын үүрэн холбооны Скайтел компани