Монголын хүчирхэг чадалтай хамтлагийн тоонд зүй ёсоор багтдаг Харанга хамтлагийнхан энэ зуныг зүгээр сууж өнгөрөөхийг хүссэнгүй. Тэд өөрийнхөө бүхий л шүтэн бишрэгчдэд өөрийн ая дуугаа хүргэхээр өнгөрсөн амралтын өдрүүдээр зүүн аймгуудыг зорилоо. Монгол орныхоо бүх аймгуудын төв талбайд нь үнэгүй тоглох Харангынхан яг өөрсдийн бүрэн бүрэлдэхүүнээрээ явж байгаа.

Харанга хамтлагийг ийм сайхан боломж олгоно гэдгийг сонссон хөдөөгийн фенүүд нь тэдний ирэх өдрийг хоног тоолон хүлээж суугаа гэнэ. Харин өршөөлөөр суллагдсан дуучин Лхагваагийн хувьд эрх чөлөөтэй болсноос хойшхи хамгийн анхны аялан тоглолт нь юм. Ингээд түүнээс хэдэн зүйл тодрууллаа.

-Сайн байна уу? Танай хамтлаг эх орноо тойрон аялан тоглолт хийх гэж байгаа юм байна. Энэ талаараа та сонирхуулаач?
-Тийм, бид хамтлагаараа бүх аймгуудаар явж аялан тоглолт хийх гэж байгаа. Ер нь энэ талаар манай Чукагаас асуусан нь дээр байх аа. Би мэдэгдэл хиймээргүй байна.

-Яагаад?
-Би сэтгүүлчдэд ярилцлага өгөхөөр хэрэлдчих гээд байдаг юм. Тийм болохоор ямар нэгэн юм яримааргүй байна л даа.

-Уучлаарай. Яагаад хэрэлдчих гээд байдаг шалтгааныг чинь асууж болох уу?
-Манай сэтгүүлчид хүнээс юм асуухдаа маш төвөгтэй асуудаг. Бас зөв асуухгүй дандаа буруу асуудаг. Ер нь би Монгол хэлээ мартчихсан юм уу, сэтгүүлчид Монгол хэлээ мэдэхгүй байгаа юм уу гэмээр л олон зүйл ярьдаг шүү дээ. Тэгэхээр би тэдэнтэй олон юм яримааргүй санагдаад байдаг юм.

-Энэ дагуулж яваа охин таны найз бүсгүй юу?
-Би энэ талаар юу ч яримааргүй байна. Түүнтэй өөр олон олон зүйлсийн талаар ярилцах гэсэн боловч дуучин Лхагваа дургүйцсэнээр бидний яриа өндөрлөсөн юм. Юутай ч эх орноо тойрон аялан тоглох гэж байгаа тэрээр үнэхээр сэтгэл өндөр байсан. Тэрээр найз охиноо дагуулж явсан бөгөөд түүний талаарх нэг ч асуултад хариу өгөхийг хүссэнгүй.

Тэрээр хар тамхины хэрэгт орооцолдон аавын хаалга татсанаас хойш ямар нэгэн мэдэгдэл хийж, сонин сэтгүүлд ярилцлага өгөхөө бараг л больсон гэхэд болно. Юутай ч хот хөдөөгийн бүх фенүүдээ баярлуулах болсон тэдний аялан тоглолтын маршрут зүүн аймгуудаас эхэлж байгаа бөгөөд дараа нь төвийн болон баруун аймгуудаар тоглоно. Монгол орноо тойрон 21 аймгаар тоглосныхоо дараа нийслэл хотдоо гурван өдөр тоглож үнэнч фенүүдийнхээ магнайг нь тэнийлгэхээр болжээ.