Залуусын хайр дурлал, амьдралын төлөөх тэмцэл бүхий сонирхолтой адал явдлаар дүүрэн өрнөх "Буруу эргэлт" уран сайхны кино үзэгчдийн хүртээл болоод багагүй хугацаа өнгөрлөө. Тэгвэл тус киног бүтээсэн "Шинэ үе" продакшны уран бүтээлчид ээлжит сюрпризээ барьж, авьяас чадвараа гайхуулахаар зэхэж байгаа талаарх мэдээлэл чих дэлслээ. Ингээд "Шинэ үе" продакшны захирал, Соёлын тэргүүний ажилтан, жүжигчин С.Ариунболдоос цөөн асуултад хариулт авсан юм.

-"Буруу эргэлт" киногоороо дэлгэцийн бүтээлд хүчээ сорьж, олныг гайхуулсан "Шинэ үе" продакшныхан магтаал шүүмжлэлийг чамгүй дуулсан. Тэгвэл өдгөө дахин шинэ кино хийхээр төлөвлөсөн гэсэн, үнэн үү?
-Тийм ээ, үнэн. Гэхдээ киноны ажлаа хараахан эхлээгүй байна. Бид одоогоор шоу тоглолтын бэлтгэл ажилдаа орчихсон байгаа. Энэ сарын 20-нд эхлэх намрын шоу тоглолтоос болоод киноныхоо ажлыг ерөнхийдөө хойшлуулсан хэрэг. Ирэх сарын эхээр л анхаарал тавьж, ажиллах боломжтой болох байх.

-Энэ удаа ямар сэдвээр хийх гэж байгаа юм бэ?
-Цэвэр инээдмийн сэдэвтэй кино. Сэдэв санаа, үйл явдлын талаар "Шинэ үе" продакшны уран бүтээлчид тойрч суугаад ярилцаж байгаа. Киноны зохиолыг Таванбаяр гэдэг залуу бичихээр болсон. Эхний ээлжинд шоу тоглолтоо үзэгчдэд сонирхуулахаар төлөвлөж байгаа учраас ирэх намар кино зураг авалтаа хийж эхлэх болов уу.

-Шинэ киноны тань гол дүрд залуу дуучин ВХ тоглоно гэх юм. Үнэн юм уу?
-ВХ-ийг тоглуулах эсэх талаар тоймтой шийдсэн зүйл алга, одоохондоо ярилцаж байна. Харин дуучин Ч.Ану болон олны танил залуу уран бүтээлчдийг тоглуулах зорилгоор санал тавиад амжсан. Үүний зэрэгцээ, мэргэжлийн жүжигчид ч кинонд маань тоглох юм. Миний хувьд, ихэвчлэн залуу уран бүтээлчидтэй хамтарч ажиллах бодолтой байгаа.