Герман улсад манай орны урлаг соёл, зан заншлыг сурталчлах хотхон байгуулахаар хэсэг залуус шийдсэн байна. Тэд үүнийг байгуулах туршлагатай бөгөөд “Туурайн төвөргөөн” олон улсын хөгжмийн наадмыг зохион байгуулж, хийсэн ажилтай, туршлагатай болсон юм байна.

Ханбург хотын “Мундехоф” хэмээх амьтны хүрээлэнд Монгол гэр барьж, орж ирсэн хүмүүст ардын урлаг, ёс заншил, нүүдэлчин аж амьдралыг маань танилцуулах гэж байгаа юм байна. Одоогоор тэд нэг л гэртэй байгаа бол наадмаас өмнө арваас дээш тооны гэр барихаар төлөвлөж байгаа юм. Германы зүгээс тэдэнд амьтны хүрээлэнд тэмээ, морь зэрэг мал авчирахыг зөвшөөрсөн бөгөөд соёлын танилцуулах ажлыг улам нэмэгдүүлэхийг дэмждэг гэнэ.

Германд ийнхүү соёлын төв, гэрүүдийг байгуулсаар байгаа бол АНУ-д удахгүй Монгол хэл дээрх жүжгийн нээлт болох гэж байна. Тэр нь мөн л наадмын өдөр болох бөгөөд жүжгийг АНУ-д байгаа Монголчуудын амьдралаас сэдэвлэсэн “Би хэн бэ?” гэдэг жүжиг ажээ. Зохиолыг жүжигчин Б.Болдбаатар санааг нь гаргаж, жүжигчин Б.Болормаатай хамтран бичсэн юм байна. Бусад уран бүтээлчид ч цөмөөрөө Монголчууд байгаа гэнэ. Жүжгийн нээлтийг Арлингтон дахь Росслин Спектрум театрт болох аж.

Нээлтэд оролцохыг хүссэн хүмүүс 30 доллараар тасалбараа худалдан авч байна. АНУ-д байгаа Монголчуудын хувьд энэ нь өөрсдийн драмын урлагаа танилцуулах нэгэн боломж юм. Цаашлаад өөр салбарт ч танилцуулах гэхээсээ илүү АНУ-д байгаа Монголчуудад зориулсан иймэрхүү үйл ажиллагаа тасрахгүй биз ээ.