Долдугаар сарын 1-ний цагдаа нарт холбогдох хэргийн шүүх хурал Сүхбаатар дүүргийн шүүхийн танхимд болох байсан ч шүүгдэгчдийн зүгээс шүүх бүрэлдэхүүнд итгэхгүй байна хэмээн үзсэнээр хойшиллоо.

Хохирогчид болон цагдаагийн ар гэрийнхний зүгээс ирүүлсэн шүүх хурлыг хойшлуулах хүсэлтийг шүүх бүрэлдэхүүн авч хэлэлцээд тухайн үед Нийслэлийн цагдаагийн газрын Хэв журмын хэлтсийн даргаар ажиллаж байсан Г.Ганбаатарт холбогдох хэргийг хэлэлцэхээс хойшлуулж, бусад холбогдогчдын хэргийг шүүхээр болсон.

Ингэснээр бусад холбогдогчдод хамаарах шүүх хурал эхлээд байсан ч явцын дунд шүүгдэгчийн өмгөөлөгч О.Алтангэрэл шүүх бүрэлдэхүүнд үл итгэж буйгаа илэрхийлсэн байна. Ингэснээр шүүх хурал тодорхой хугацаагүйгээр хойшлогдлоо.

Гэхдээ хаалттай хаалганы цаана чухам ямар үйл явц өрнөж байгаа нь төдийлөн тодорхой бус байна.

Дашрамд дурьдахад, шүүх хуралд гэрчээр дуудаад байсан тухайн үеийн төрийн өндөр албан тушаалтнуудаас нэг нь ч ирээгүй байгаа аж. Энэ талаар шүүх бүрэлдэхүүн ямар нэг тайлбар хийхээс татгалзсан юм.

Д.Сүх /www.mminfo.mn/