Дэлхийн түүхэд хоёрдугаар сарын 18-нд болсон онцлох гурван үйл явдлыг танилцуулъя.

1930 оны хоёрдугаар сарын 18. Дэлхийн ван гарагийг нээв

Нарны аймгийн ес дэх гараг хэмээн үздэг байсан Дэлхийн ванг 1930 оны хоёрдугаар сарын 18-нд одон орон судлаач Клайд Томбо АНУ-ын Лоуэлийн ажиглалтын төвд нээжээ.

Ес дэх гараг оршин байдаг талаарх онолыг анх Персивал Лоуэл дэвшүүлсэн бөгөөд байршлын таамаг дэвшүүлж 10 жил хайсан ч олоогүй.

Гэхдээ түүний таамгийн тусламжтайгаар Дэлхийн ванг илрүүлсэн бөгөөд тус биетийг өдгөө Нарны аймгийн бага гарагуудын нэгээр тооцдог.

2006 оны хоёрдугаар сарын 18. Өвлийн олимпод түрүүлсэн анхны өнгөт арьст тамирчин

АНУ-ын тэшүүрчин Шани Дэвис 2006 оны хоёрдугаар сарын 18-нд Өвлийн олимпын ганцаарчилсан төрөлд түрүүлсэн анхны өнгөт арьст тамирчин болсон.

Тэрээр 2006 оны Турины олимпын үеэр тэшүүрийн эрэгтэйчүүдийн 1000 метрийн төрөлд түрүүлсэн бөгөөд мөн 1500 метрийн төрөлд мөнгөн медаль хүртжээ.

Өдгөө 39 настай Шани Дэвис 2010 оны Ванкуверийн өвлийн олимпод амжилтаа давтсанаар 1000 метрийн төрөлд дараалан түрүүлсэн анхны тамирчин болсон.

2014 оны хоёрдугаар сарын 18. Украины хувьсгал эхлэв

Ерөнхийлөгч Виктор Януковичийг эсэргүүцсэн жагсаал хурцдаж Украины нийслэл Киев хотноо 2014 оны хоёрдугаар сарын 18-нд хувьсгал өрнөсөн.

Улс даяар үргэлжилсэн эсэргүүцлийн жагсаал, иргэд хүчнийхний хооронд өрнөсөн мөргөлдөөний улмаас Ерөнхийлөгч Янукович суудлаа өгч, Украины Засгийн газар огцорчээ.

Мөргөлдөөний улмаас 113 хүн нас барсан бөгөөд хожим 2019 онд Януковичид эх орноосоо урвасан хэргээр 13 жилийн хорих ял оноосон.