Газрын тос боловсруулах үйлдвэрийн Анхдагч технологийн болон дагалдах байгууламж, Цахилгаан станцын инженерчлэл, худалдан авалт, барилга угсралтын гэрээнд өнөөдөр гарын үсэг зурлаа.

Монгол улсад нефть-химийн шинэ аж үйлдвэрийн салбарын суурийг тавих Газрын тос боловсруулах үйлдвэр байгуулах төсөл төлөвлөлт, инженерчлэлийн үе шатнаас 2021 онд бүтээн байгуулалтад шилжсэн.

Газрын тос боловсруулах үйлдвэрийн бүтээн байгуулалтыг дөрвөн багц ажилд хуваан хэрэгжүүлж байна.

EPC 01 багц ажил буюу Технологийн бус барилга байгууламж-д, иргэний 9 барилга, 44 км ус дамжуулах хоолой, 30 мянган м.куб багтаамжтай усны нөөцийн резервуар, үйлдвэрийн талбайн дэд бүтцийн байгууламжууд багтаж буй бөгөөд барилга угсралтыг БНЭУ-ын “Жэй Эм Си Прожектс Индиа” компани 2021 оноос эхлүүлсэн, ирэх оны дунд үед гүйцэтгэж дуусна.

EPC 02 багц ажил буюу Анхдагч процессийн болон дагалдах байгууламж-д, Атмосферийн болон Вакуум нэрлэгийн байгууламж, Хий ялгах байгууламж, 42 ширхэг түүхий тос, завсрын болон эцсийн бүтээгдэхүүний агуулах сав, резервуар, төмөр зам болон авто замын ачих буулгах байгууламж, ус цэвэршүүлэх систем, шугам хоолойн тулгуурууд, хэрэглээний бусад байгууламжуудын нарийвчилсан зураг төсөл, барилга угсралтын ажил багтаж байна.

EPC 03 багц ажил нь 35 мегаваттын хүчин чадалтай, уурын 2 турбин бүхий Цахилгаан станц-ын нарийвчилсан зураг төсөл, барилга угсралтын ажил юм.

EPC 02 болон EPC 03 багцын инженерчлэл, худалдан авалт, барилга угсралтын ажлын Ерөнхий гүйцэтгэгч шалгаруулах тендерүүдийг төсөл хэрэгжүүлэгч “Монгол газрын тос боловсруулах үйлдвэр” ТӨХХК Энэтхэгийн талтай хамтран зохион байгуулсан.

Тендерт хамгийн бага үнийн санал ирүүлсэн БНЭУ-ын “Megha Engineering & Infrastructure Limited” (Мега инженеринг инфрастракчер лимитед) компанитай Инженерчлэл, худалдан авалт, барилгын угсралтын гэрээ байгуулах асуудлыг Засгийн газрын 26-ны өдрийн хуралдаанаар шийджээ.

Үүний дагуу өнөөдөр “Монгол газрын тос боловсруулах үйлдвэр” ТӨХХК-ийн Гүйцэтгэх захирал Д.Алтанцэцэг, “Megha Engineering & Infrastructure Limited” компанийн боловсруулах үйлдвэрлэл хариуцсан захирал, ноён Палимпати Доория нар гэрээнд гарын үсэг зурлаа.

Ёслолд Шадар сайд С.Амарсайхан, БНЭУ-аас Монгол улсад суугаа онц бөгөөд бүрэн эрхт элчин сайд М.П.Сингх, Ерөнхийлөгчийн зөвлөх Б.Даваадалай, УУХҮЯ, ГХЯ, ЭЗХЯ, Сангийн яамны албан тушаалтнууд, Төслийн менежментийн зөвлөх “Инженерс Индиа Лимитед” компанийн төлөөлөгчид оролцлоо. Мөн БНЭУ-ын ЭКСИМ банк, “Инженерс Индиа Лимитед” компанийн удирдлагууд Нью Дели хотоос цахимаар оролцлоо.

“Megha Engineering & Infrastructure Limited” компани EPC 02, 03 багц ажлуудыг хамтад нь гүйцэтгэнэ. 2025 оны 4-р улиралд бүтээн байгуулалтыг дуусгах үүрэг хүлээж байна.

Тус компани дэлхийн 20 гаруй оронд салбартай, дэд бүтэц, газрын тос, байгалийн хий, цахилгаан эрчим хүч, ус хангамж, дамжуулах хоолойн чиглэлээр төсөл хэрэгжүүлдэг, хэд хэдэн оронд тоног төхөөрөмжийн үйлдвэртэй, 30 гаруй жилийн туршлагатай компани юм.

ГТБҮ-ИЙН ХАМГИЙН СҮҮЛИЙН БУЮУ EPC 04 БАГЦ АЖЛЫН ИНЖЕНЕРЧЛЭЛ, ХУДАЛДАН АВАЛТ, БАРИЛГА УГСРАЛТЫН АЖЛЫН ТЕНДЕР ЗАРЛАЛАА

EPC 04 багц ажил буюу Үйлдвэрийн гүн боловсруулалтын, патенттай технологийн байгууламжуудад Устөрөгчийн үйлдвэр, Хүхэр ялгах, Висбрекинг, Гидрокрекинг, Шингэрүүлсэн шатдаг хийн цэвэрлэгээ, Дизелийн гидроцэвэрлэгээ, Бензин боловсруулах байгууламжууд багтана.

Эдгээр байгууламжуудын Технологийн лиценз эзэмшигчид болох UOP Honeywell (АНУ), Axens (Франц), Kinetics Technology (Итали), Shell (Нидерланд) компаниуд байгууламж тус бүрийнхээ зураг төсөл, инженерчлэлийн багцыг боловсруулж дуусч байгаа бөгөөд энэ нь EPC 04 багц ажлын тендерийн Техникийн хэсэг болж, ерөнхий гүйцэтгэгчийг сонгон шалгаруулах тендер зарлагдлаа.

Ингэснээр Газрын тос боловсруулах үйлдвэрийн бүх технологийн байгууламжуудын нарийвчилсан зураг төсөл хийгдэж, барилга угсралтын ажил ирэх оноос өрнөх нөхцөл бүрдэж байна.

Өнөөдрийн байдлаар "Монгол газрын тос боловсруулах үйлдвэр" ТӨХХК Энэтхэг, Итали, Франц, АНУ,  Нидерланд, БНХАУ зэрэг улс орнуудтай хамтран ажиллаж байна. Уг өндөр технологийн, хүнд аж үйлдвэрийн цогц бүтээн байгуулалтад дотоод, гадаадын мянга гаруй инженер, мэргэжилтнүүд оролцон ажиллаж байна хэмээн “Монгол газрын тос боловсруулах үйлдвэр” ТӨХХК-иас мэдээлэв.