Засгийн газрын өнөөдрийн ээлжит хуралдаанаар чиг үүргийн давхардал бүхий төрийн өмчит зарим үйлдвэр, компаниудыг татан буулгах, нэгтгэх шийдвэр гаргалаа.

Тухайлбал, “Монгол Ус” төрийн өмчит аж ахуйн тооцоот үйлдвэрийн газрыг татан буулгалаа. Мөн ХЗДХЯ-ны харьяа байгууллагуудын ажилчдын хувцас үйлдвэрлэдэг  “Цагаан шонхор” төрийн өмчит үйлдвэрийг БХЯ-ны харьяа “Бөртэ” үйлдвэртэй нэгтэхээр шийдвэрлэв. 

Буянт-Ухаа спорт цогцолборт БНХАУ-ын буцалтгүй тусламжаар 30 гаруй тэрбум төгрөгийн засвар хийж байгаа бөгөөд засварын ажлын дараа тус цогцолборыг “Үндэсний шигшээ багийн бэлтгэл, сургалтын төв”-тэй нэгтгэлээ.

Эрчим хүчний хөгжлийн төв, Геологийн судалгааны төвийг нэгтгэн төрийн өмчит хязгаарлагдмал компани болгон өөрчлөн зохион байгуулах асуудлыг Засгийн газрын хуралдаанд танилцуулан шийдвэрлүүлэхийг холбогдох албан тушаалтнуудад үүрэг болголоо.

“Радио телевизийн үндэсний сүлжээ”, “Уур амьсгалын өөрчлөлтийн судалгаа, хамтын ажиллагааны төв”, “Аялал жуулчлалын хөгжлийн төв”, “Монгол, Кувейтийн байгаль хамгаалах төв” төрийн өмчит аж ахуйн тооцоот үйлдвэрийн газар болон  Хөдөө аж ахуйн бирж, “Авто импекс”, “Дархан арьс ширний цогцолбор бүтээн байгуулалт” компани зэрэг цаашид төр оролцох шаардлагагүй, хувийн хэвшил гүйцэтгэх боломжтой үйл ажиллагаа эрхэлж буй аж ахуйн нэгжүүдийг татан буулгах, эсхүл ижил төстэй байгууллагатай нэгтгэх, бүтцийн өөрчлөлт хийх асуудлыг холбогдох яам, агентлаг, Төрийн өмчийн бодлого зохицуулалтын газарт даалгаж, 2022 оны наймдугаар сард багтаан Засгийн газрын хуралдаанаар шийдвэрлүүлэхийг үүрэг болголоо.