Биеийн тамир спортын газраас томилогдсон комисс хуралдан жүдо бөхийн шигшээ багийн ахлах дасгалжуулагч болон дасгалжуулагч нарыг сонгон шалгаруулж шийдвэрээ гаргасан ч албан ёсоор тушаал гарсны дараа мэдээлэл өгөх бололтой.

40 орчим хүн материалаа ирүүлснээс найман дасгалжуулагч шалгарч үлдсэн талаар бид мэдээлсэн билээ.

Сонгон шалгаруулалтанд О.Балжинням /Алдар спорт хорооны дарга/, Г.Эрдэнэбат /Биеийн тамир, спортын дунд сургуулийн жүдо бөхийн дасгалжуулагч/, Г.Жамсран /самбо бөхийн дэлхийн таван удаагийн аварга/, Ш.Бат-Орших /”Хангарьд” спорт хорооны дасгалжуулагч/, М.Цэвэлмаа /”Женко” клубын эмэгтэй багийн дасгалжуулагч, түүний шавь нар жүдо бөхийн насанд хүрэгчид, өсвөр, залуучуудын УАШТ болон бусад тэмцээнд сүүлийн хэдэн жил багаараа тэргүүлж байгаа/, Ц.Шийрэв /”Хонгор нутаг” дэвжээний дасгалжуулагч, шигшээ багийн шилдгүүд болох Д.Төмөрхүлэг, Б.Бат-Эрдэнэ, А.Давааням нарын анхны багш/, Д.Батсайхан /Алдар спорт хороо жүдо бөхийн дасгалжуулагч/, Д.Нямхүү /дасгалжуулагч/ нарын найман дасгалжуулагч багтжээ.

Эх сурвалжийн мэдээлснээр бол шигшээ багийн ахлах дасгалжуулагчаар Монгол Улсын аварга Одвогийн Балжинням томилогдох магадлал тун өндөр байсан гэсэн юм.

Аваргын хувьд жүдо бөхөөр дэлхийн болон олон улсын тэмцээнээс 14 алт, есөн мөнгө, таван хүрэл медаль хүртэж байсан дэлхийд данстай бөх билээ.