Байгалийн чулуугаар “Жалам хар” эгшиглүүлэх эдгээр сурагчид Баянхонгор аймгийн Баянлиг сумынх. Сурагчдын төлөөлөл болгон С.Анужин охинтой ярилцлаа. Тэрээр Баянлиг сумын “Эрдмийн ундраа” ахлах цогцолбор сургуулийн гуравдугаар ангид суралцдаг юм.

-Та нар хэзээнээс чулуун хөгжмөөр тоглож эхэлсэн бэ?

-Өнгөрсөн жилийн есдүгээр сараас эхлэн чулуугаар хөгжимдөх болсон. Манай аймагт төдийгүй Монголын хаана ч ингэж тоглодоггүй гэдэгт итгэлтэй байна.

- Чулуугаар хөгжим тоглохыг хэн санаачилсан юм бол?

-Манай сургуулийн дуу хөгжмийн багш Эрдэнэцэцэг санаачилсан. Эрка багш хөдөөнөөс чулуугаа сонгож түүгээд л бидэнд ялгаж өгдөг. Тэгээд чулуугаа хөөсөнцөр дээр байрлуулаад скочоор тогтоодог юм.

-Чулуунуудаа бас их нарийн байрлуулдаг бололтой. Бас чулуу тус бүр дээр до, ре, ми гээд ялгаад биччихэж?

-Тийм ээ. Хөгжмийн багш өөрөө чулуунуудаа тогшиж үзээд бичиж өгдөг. Үүний дагуу нотоо хараад тоглочихдог.  Чулуугаа зөв байрлуулчихсан байхад ямар ч аяыг тоглочихно. Гэхдээ хэн нэгэн нь алдаж болохгүй. Миний хувьд “Жалам хар”, “Маамуу нааш ир” дууны аяыг тоглох дуртай. Зөв, буруу байрлуулахыг багш л мэднэ ээ.

-Цохиуруудын харахад өөр, өөр юм аа. Өөрсдөө бэлддэг бололтой?

-Савх, харандаа, балны гадна талыг ашиглана. Тэгээд хойд талд нь үсний боолтынхоо бондгор бөмбөлөг хэлбэртэй зүйлийг нааж өгнө. Төмрөө улайсгаж байгаад бөмбөлөг зүйлээ хатгаад л тогтооно. Модтой чихэр шиг л харагдаж байгаа биз дээ. Чулуу цохидог болохоор удаан тэмдэггүй юм оо. Сайн улайлгавал бат бөх тогтоно.

-Чулуун хөгжмөө та нар юу гэж нэрлэдэг вэ?

-Нэр өгч амжаагүй байгаа. Ямар нэр өгөх вэ гээд л ярьцгаадаг л одоо хүртэл байхгүй.

-Сумаасаа өөр газар чулуун хөгжмөө тоглож сонирхуулсан уу?

-Аймагт нэг удаа тоглосон. Хүмүүс их сонирхсон л доо. Миний хувьд сумаасаа өөр газар төгөлдөр хуур, ятга тоглож байсан.

-Чи тэгвэл мундаг авъяастай юм аа. Гэр бүлийнхэн нь ийм авъяастай юу?

- Манай хамаатны эгч болох Урнаа, Марлаа нар урлагийн авъяастай. Би бол айлын ганц охин л доо. Хөгжмөөс илүү бүжгийн авъяастай. Хоёр, гуравдугаар ангидаа дараалан бүжгээр алтан медаль хүртсэн. Хотод очоод бас түрүүлсэн.

-Том болоод миний дүү урлагийн хүн болох уу?

-Үгүй ээ. Бүжигчин болно гэж бодож байсан л даа. Гэхдээ эмч болно. Ээж минь өөд болчихсон л доо. Тийм учраас олон хүний амь насыг аврахыг тулд эмч болно. Аав хотод ресторанд тогооч хийдэг. Манай аав Энэтхэг хүн л дээ. Манай аав Монголоор болон ямар ч хэлээр ярьдаг ш дээ. Намайг анх хотоос ирэхэд сумын хүүхдүүд “америк хүүхэд” гэдэг байсан. Би хотод төрсөн л дөө. Нэгдүгээр ангид хотод байхад ээжийн бие өвдөөд агаартай гээд энд ирсэн. Тэгээд ээж минь өөд болж би энд өвөө, эмээ дээрээ үлдсэн дээ. Зун болохоор аав дээрээ очдог.

-Сумын төв, хот хоёрын аль нь гоё вэ?

-Сумын төв. Амьсгалахад гоё санагдахгүй байна уу танд.

-Тиймээ. Гоё байна. Хүүхдийн баяраар хотод байх уу?

-Хичээл тарчихсан байвал хотод баярлах байх даа.