"Ulaanbaatar 2015" туялзуур сэлэмний залуучуудын Азийн аварга шалгаруулах тэмцээн ирэх сарын 7-12-ны өдрүүдэд манай улсад болох гэж байгаатай холбогдуулан энэхүү спортын үүх түүх болоод ашиг тусын талаарх мэдээллийг та бүхэнд хүргэж байна.  

ТҮҮХ

Туялзуур сэлэм нь эртний тулааны төрлөөс үүсэлтэй талаар Хомероос эхлээд Уильям Шекспир хүртэл бичин тэмдэглэсэн байдаг юм.

Нөгөөтэйгүүр, туялзуур сэлэмний спорт нь 1896 оноос зохион байгуулагдаж эхэлсэн орчин цагийн Олимпийн наадамд бүгдэд нь оролцсон дөрөвхөн спортын төрлийн нэг. 

Орчин цагийн туялзуур сэлэмний спорт анх Испани улсаас үүсэлтэй гэдэг бөгөөд Испаний байлдан дагууллын хамт дэлхий даяар тархан хөгжсөн байна. XV зуунаас эхлэн Италийн өмнөд хэсэг, Сицили, Палермо улмаар Францын язгууртнуудын дунд түгэн дэлгэрсэн тус спорт 2009 оноос Монгол Улсад хөгжиж эхэлсэн юм.  

Энэ спорт танд ямар ашигтай вэ?

Туялзуур сэлмээр тулалдахад багахан хугацаанд тэмцээний хувь заяа бүрэн эргэж болдог учраас тамирчдаас сэтгэлгээний хурд, авхаалж самбаа болон өв тэгш бие галбир шаардахын зэрэгцээ хүнд байх ёстой бүхий л чадварыг цогцоор нь хөгжүүлдөг юм. 

Бие болоод оюун санааны гайхалтай хослол болсон энэхүү спортоор бүх насны хүн хичээллэх боломжтой.

Жишээлбэл, 2000 оны Олимпийн наадамд туялзуур сэлэмний эмэгтэйчүүдийн төрөлд мөнгөн медаль авсан Швейцарийн Софи Ламин тухайн үед ердөө 15-хан настай байв. Харин 1912 оны Стокгольмын Олимпд оролцсон Австрийн тамирчин Карл Мюнхен 64 настай байжээ.  

Мөн энэхүү спортоор та ердөө нэг цаг хичээллэхэд ойролцоогоор 400 калори шатаах болно.