“Муурны хөөрхөн зулзага” бүхий зураг цахим ертөнцөд хамгийн их алдартай байдаг гэнэ. Ийм зургийг дэлхийн бүх хүн харж үнэлээд амжсан байдаг нь нууц биш.

Ямар ч амьтны нялх нь хөөрхөн байдаг гэж монголчууд хүртэл хэлдэг. Харин хөөрхөн амьтны зургийг голдуу эмэгтэйчүүд харж байдаг гэвэл эндүүрэл бөгөөд эрчүүдийн дунд ч тийм хүмүүс бас тааралддаг байна.

Интернетэд ийм төрлийн зураг хараад зүгээр сууж байна хэмээн ажил олгогч эзэд санаа зовоод хэрэггүй хэмээн Хирошимагийн их сургуулийн эрдэмтэд нотолж байгаа юм. Харин ч эсрэгээр ажилчдынхаа хөдөлмөрийн бүтээмжийг дээшлүүлэхийг хүсч байгаа бол гэрийн тэжээвэр амьтны зулзагын зургийг хаа нэгтэй өлгөх хэрэгтэй гэнэ.

Эрдэмтэд туршилт явуулсан бөгөөд залуучуудыг гурван хэсэг болгон хувааж эхний хэсэгт нь “хөөрхөн амьтантай” зураг харуулжээ. Харин хоёр дахь бүлэгт нас бие гүйцсэн амьтны зургийг танилцуулсан бол гурав дахь бүлэгт ямар нэгэн зураг харуулаагүй байна. Дараа нь туршилтанд оролцогчид гарын хөдөлгөөнийг түргэсгэх тоглоом тоглож, шаардлагатай зүйлс дээр анхаарлаа төвлөрүүлэх чадвараа харуулсан байна. Мэдээж хэрэг зулзаганы зураг харж байсан бүлгийн гишүүд хамгийн сайн гэх дүн авсан бол хоёр дахь бүлгийнхэн дажгүй гэж хэлэгджээ. Харин муу үнэлгээг юу ч хараагүй залуучууд авсан байгаа юм.

Японы эрдэмтдийн нотолж байгаагаар ямар нэгэн тэжээвэр амьтны зураг бидний оюун ухаанд нөлөөлдөг нь байгалиас заяасан зүйл. Хөөрхөн хүүхэд хараад бид өөрийн эрхгүй анхаарал халамж тавьж эхэлдэг нь үүнтэй холбоотой гэнэ.

Т.Бүрэн