Наурызын баярын өдөр уламжлалаар эхлээд эцэг эхтэйгээ золгоод дараа нь хамаатан садны хамгийн ахмад хүмүүстэй золгоно. К.Ерикийн ээж нь хөдөөнөөс ирсэн байсан учир түүний найзууд ээжтэй нь золгохоор иржээ.

Сайн сайхан утгатай үг хэлэлцэн хоорондоо золгох нь тэр жилийн туршид тухайн ерөөл шигээ ариун тунгалаг, зөв явна гэж үздэг тул аль болох зөв, сайхан харьцахыг эрмэлзэнэ.

Баярын ширээ зассан өрөөнд домборын ая эгшиглэж, казах ардын дууг цугласан олонд аялан, үндэстний ёс заншлаараа мэндчилэн золгож байлаа. Домбор бол казах үндэстний эртний чавхадаст хөгжим, зарим казах айлд өндөр настан, нялх гэлтгүй бүгдээрээ домбороор хөгжимдөж чаддаг.

Үндэсний баяр нь тохиож байгаа тул гэрийн эзэгтэй идээ шүүсээ бэлтгэжээ. Ширээн дээр нь асгасан амтат боов, чихэр жимс, жигнэсэн гуриланд ороосон ногоо, каз, хонины толгой, аарцтай хөц будаатай шөл зэрэг идээ бэлтгэсэн нь үндэсний өнгө төрхийг илэрхийлж байлаа.

Өнгө алагласан идээ, шүүсний ард гэрийн эзэд болон зочид гар аргаар урласан хээ хуаран чимэглэлтэй үндэсний хувцсаараа гоёжээ.

Гэрийн эзэн К.Ерикт гэргий Т.Бахытгүл нь идээний дээжээ өгч байна.

Гэрийн эзэгтэй Т.Бахытгүл нь үндэснийхээ хээ угалзаар чимэглэн оёсон, хатгасан ширдэг, ор дэр уут сав өв соёлын зүйлс хувцас хунар тоног хэрэгслүүдээ өөрийн гараар урлан бүтээж, гэрээ гоёж, тохижуулсан байхыг нь харахад “гэр музей” гэлтэй сэтгэгдэл төрөв.

Мэнд усаа мэдэлцэн, амар тайвныг ерөөсний дараа хол, ойрын сонин сайхныг ярилцан, баярын зоог, шүүс барихаар зочид зочны өрөөнд тухалж буй нь

Хамгийн настай, хүндтэй нэгнээр тухайн зоог, ирсэн зочдод зориулан бата- ерөөл хэлүүлдэг байна. Уг ерөөлийг хэлж байхад бүгд алгаа хавсран нүүр лүүгээ харуулж барина.

Ерөөл хэлж дууссаны дараа хамтдаа бүгд “Амин” буюу “ерөөл бат оршиг” гэсэн утгатай үг хэлж хавсарсан хоёр алгаа нүүрэндээ хүргэх бөгөөд энэ нь уг ерөөлийг хүлээн авлаа гэсэн утгыг илэрхийлнэ.

Махыг ахмад настай эрэгтэй хүн хөндөнө.

Казахын үндэсний хоол каз

Уг баярыг тэмдэглэх нь хүүхэд залуусын хүмүүжилд чухал нөлөөтэй. Хүүхдүүд бөөнөөрөө цугларан шагайн наадгайгаар тоглож байгаа нь.