Манай улсад Дэлхийн эрүүл мэндийн байгууллага болон олон улсын байгууллагуудаас мэргэжилтэн, сайн дурын ажилтнууд нэлээд ирж заавар, зөвлөгөө өгч тусламж дэмжлэг үзүүлдэг. Энэ удаа ТББ-уудыг чадваржуулахад туслахаар Уилльям Бүүт хэмээх зөвлөх багш ДЭМБ-аас иржээ. Түүнтэй уулзаж ярилцлаа.

-Монгол нутагт ирж байв уу. Манай орныг хэрхэн төсөөлж байсан бол?
-Ирж байсангүй. Говь, цөлөөр л төсөөлж байлаа. Харин би нисэх буудалд буугаад хот руу ирэхдээ олон барилга баригдаж байгааг хараад хөгжиж байна гэж ойлгосон.

-Та ямар хугацаанд ажиллаж, юу хийх вэ. Миний сонссоноор гурван Төрийн бус байгууллагын үйл ажиллагааг чадваржуулахад туслана гэсэн?
-Хоёр сарын хугацаатай ажиллана. ТББ-ыг чадваржуулахын тулд ажилтнуудад анхаарлаа хандуулах нь чухал. Ингэснээр тухайн байгууллага илүү хүчтэй болж нийгэмд нөлөөлөх нөлөөлөл нь тогтвортой болдог. Би "Залуус эрүүл мэнд төв", ХДХВ, ДОХ-той тэмцэх үндэсний сан, гей залуусын "Хамтдаа" төвд ажиллана.

-Та олон нийтийн ажилд хичнээн жилийг зарцуулж байна вэ?
-Олон жил ажилласан. Би Канад улсын иргэн. Нью-Йоркт 25 жил амьдарсан.

-Таны ажилладаг гол чиглэл нь?
-ХДХВ, ДОХ-ын чиглэлээр ажилладаг. Өмнө нь биеэ үнэлэгч хүүхнүүдэд хэрхэн халдвараас сэргийлэх талаар НҮБ-ын шугамаар хичээл зааж байсан.

-ДЭМБ-ын ажилтнууд олон газарт очиж ажилласан байдаг. Таны очсон газарт дээрх өвчнүүдийг нийгэм нь хэрхэн хүлээж авдаг, ямар ойлголттой байдаг вэ?
-Хүлээж авах нь янз янз байдаг. Аливаа зүйлийг хүлээж авах нь шашин шүтлэг, соёл, ёс заншлаасаа шалтгаалдаг. Харин танай улсын хувьд хүмүүс нь их нээлттэй болохоор ажиллахад дөхөм юм болов уу гэж бодож байгаа. Бас Монголчууд их сайхан харьцаатай улс юм гэдгийг хэлмээр байна. Миний томилолтын хугацаа хоёр cap. Дараа би дахин хэзээ ирэхээ хэлж мэдэхгүй байна.

С.Туул