Улсаас сургуулийн өмнөх насны хүүхдийн хоолны мөнгийг 100 хувь дааж, эцэг эхчүүдээс нэг ч төгрөгийн зардал гаргуулахгүй байхаар шийдвэрлэсэн. Хэдийгээр энэ шийдвэр батлагдсан өдрөөсөө хэрэгжиж эхэлсэн гэх ч амьдрал дээр эцэг эхчүүд цэцэрлэгийн удирдлагад мөнгөн хураамж төлсөн хэвээр л байна. Бараг бүх цэцэрлэг хандив нэрийн дор 10-70 мянган төгрөг хурааж авч байгаа. Гэхдээ үүнийгээ тэд "Аав, ээжүүд зөвшөөрөөд өгч байгаа юм" гэсэн сайхан тайлбараар халхавчилдаг.

Шинэ хичээлийн жил эхэлж, үр хүүхдээ цэцэрлэгт оруулахыг хүссэн хүмүүс харьяа дүүргийнхээ цэцэрлэгийн үүдийг өдөржингөө сахисан гэхэд болно. Харин цаадуул нь хариуд нь "Манай цэцэрлэг хандивын мөнгө авч байгаа. Тийм ч баяр, ийм ч ой" гэсээр халаасыг нь хоосолж орхидог.

Ийм байдлаар ачийнхаа хүмүүждэг цэцэрлэгт албан хүчээр мөнгө хураалгасан нэгэн иргэн манай сонинд гомдол гаргасан юм. Түүний ач нь Сонгинохайрхан дүүргийн 110 дугаар цэцэрлэгт явдаг. Өнгөрсөн наймдугаар сарын 21-ний өдөр хүүхдээ бүртгүүлэхээр цэцэрлэг дээр нь очиход хандивын мөнгө гээд хүүхэд тус бүр 10 мянган төгрөг авсан байна.

Эцэг эхчүүдээс нэг ч төгрөг авч болохгүй гэсэн яамны сайдын шийдвэр гарчихаад байхад цэцэрлэгийн удирдлага хүүхдүүдийн ар гэрээс мөнгө хураасан талаар тус цэцэрлэгийн эрхлэгч Н.Мөнхжаргалаас тодруулсан юм.

-Танайх бүртгүүлсэн хүүхэд бүрээсээ 10 мянган төгрөг авсан гэж дууллаа. Уг нь төрөөс мөнгө авахыг хориглосон байдаг юм билээ?
-Бид бүртгүүлсэн хүүхэд бүрээс мөнгө аваагүй шүү дээ. Эцэг, эхчүүдийн өөрсдийнх нь хүссэнээр хандивын мөнгө авсан.

-Танай цэцэрлэгийн хүүхдүүдийн эцэг эх гомдол гаргасан юм. Албан хүчээр мөнгө авч байгаа гэж?
-Албан хүчээр мөнгө авсан зүйл огт байхгүй ээ. Манай цэцэрлэг 22 жил үйл ажиллагаагаа явуулж байгаа. Хүүхдүүдийн тоглох тоглоом нь хуучирч,  муудсан учраас бид Нийслэлийн 370 жилийн ойг угтан шинэ тоглоом авах гэж байгаа. Мөн шинэ анги нээж байгаа учраас түүнд ширээ сандал авах хэрэгтэй болоод байгаа юм. Тиймээс яах ч аргагүй эцэг эхчүүдээсээ тусламж хүссэн нь энэ. Үүнийг л буруугаар ойлгосон юм шиг байна.

-Цэцэрлэгийн засварт төрөөс огтхон ч хөрөнгө өгдөггүй юм уу?
-Сүүлийн үед санхүүгийн хямралаас үүдээд цэцэрлэгүүдэд мөнгө төсөвлөхөө больчихсон. Бид жилийн жилд л засварын ажилд гээд төсөвт нэг сая төгрөг оруулж өгөхийг хүсдэг. Гэвч ирдэггүй. Одоо төрөөс багш нарын цалинг л төлж байгаа. Засварт хэрэглэх мөнгө байдаггүй ээ.

Ямартай ч мөнгө авсан гэх цэцэрлэгийн эрхлэгчийн тайлбар энэ. Энэ цэцэрлэгийнхэн бусдыгаа бодвол бага мөнгө хурааж авсан гэдэгтэй эцэг эхчүүд санал нийлж байгаа юм.  

Манай сонинд өөр нэгэн мэдээлэл ирсэн нь Баянзүрх дүүргийн 6,62 дугаар цэцэрлэгийн хүүхдүүдийн эцэг эхийн хүсэлт юм. Тус цэцэрлэг нь заасан тооноосоо олон хүүхэд аваад бүртгэлийн хураамжинд нь 70 мянган төгрөг авч байна гэсэн. Уг нь цэцэрлэгийн нэг ангид 25 хүүхэд багтах нормтой ч хандив нэрийн дор харьяаллын бус хүүхэд авсаар одоо нэг ангид 40 гаруй хүүхэд багталцаж ядан байгаа аж. Энэ бүхэнд дургүйцсэн эцэг эх Мэргэжлийн хяналтын албанд мэдэгдсэн боловч н.Нэргүй, н.Баттогтох хэмээх хоёр байцаагч ирж шалгачихаад ямар нэгэн хариу өгөлгүй яваад өгчээ.

Өнөөдрийн байдлаар тус цэцэрлэгийн удирдлага ойн баяраа угтан ажилтан нэг бүрээсээ цалингаас нь 20 мянган төгрөг суутгадаг. Хуучин явж байсан хүүхдүүдээсээ мөн хэмжээний мөнгө суутгаж байгаа гэнэ.

Б.Өлзийдэлгэр