УИХ-ын чуулганы хурлаар Гаалийн албан татвараас чөлөөлөх тухай хууль хүчингүй болсонд тооцох тухай хуулийн төслийг хэлэлцсэн. Хэлэлцэж буй асуудалтай холбоотойгоор гишүүд асуулт асууж, хариулт өглөө. 

Энэ жил ган гачиг ихтэй байгаа тул унасан төсөл хэдий ч дахиж оруулж ирэх ёстой гэж Засгийн газар үзсэн хэмээн УИХ-ын дарга Б.Амарбаясгалан тодотгосон юм.

Хүнс, хөдөө аж ахуй, хөнгөн үйлдвэрийн сайд Ж.Энхбаяр "Евразийн эдийн засгийн холбоотой хийх хэлэлцээрт газар тариалангийн салбарын хамгаалалтыг сайтар суулгасан. Гурил, улаанбуудай, малын тэжээл дээр гэрээний үйлчлэл үйлчлэхгүй байхаар квотын буултыг хийсэн.

50 мянган тонн хүртэлх үр тариаг монголд тарьдаггүй хатуу улаанбуудайгаар жорлох үүднээс авах зохицуулалт хийсэн. Улаанбуудайн үйлдвэрлэл гэрээнд нөлөөлөхгүй.

Энэ жил улаанбуудайн үйлдвэрлэл уналттай байна. 120 мянга гаруй га талбайн тариалалт багассан. Тэгэхээр намар гэхэд 150 мянга орчим тонн үр тариа дутах байх. Энэ хүрээнд тодорхой хэмжээний эх үүсвэрийг төсөвт суулгаж, импортоор хангах арга хэмжээ авахаас өөр аргагүйд хүрсэн" гэв.

Хуулийн төслийг эцэслэн батлах эсэх дээр санал хураалт явуулахад 72 хувиар дэмжигдэж, хууль эцэслэн батлагдлаа.