Улсын Нэгдүгээр Төв эмнэлгийн Дүрс оношилгооны төвийн Цөмийн онош зүйн тасагт Монгол Улсын хоёр дахь СПЕКТ/КТ аппаратыг хүлээн авч байна.

Үйл ажиллагааг нээж хэлсэн үгэндээ ЭМЯ-ны Төрийн нарийн бичгийн дарга Д.Очирбат "Цөмийн технологид суурилсан оношилгоо, эмчилгээний тоног төхөөрөмжийг нэвтрүүлж, хүний нөөцийг бэлтгэх төслүүд хэрэгжсэнээр эрхтэн эмгэгийн үйл ажиллагаа болон хавдрын голомтот эсийг нэгэн зэрэг оношлох боломж бүрдсэн. Ингэснээр оношилгоо, эмчилгээний төрөл, чанарыг улам сайжруулж буй" гэлээ.

Улсын Нэгдүгээр төв эмнэлгийн ерөнхий захирал Л.Бямбасүрэн "Энэ аппарат бол манай эрүүл мэндийн салбарт орж буй маш том хөрөнгө оруулалт. Манай тасаг үндсэн дөрвөн чухал үйл ажиллагаа явуулж байна. Эмнэлгийн оношилгоо, эмчилгээ, радиоиммунологийн лаборатори, өвчин эмгэг, хавдрын үе шатууд тодорхойлох, эмчилгээний хяналт хийх зэргийг хариуцдаг. 

Энэ аппарат нэвтэрснээр энэ чиглэлд үйлчлүүлэх гэж буй олон үйлчлүүлэгчийн чирэгдэл багасах, олон шинэ технологи нэвтэрнэ гэж үзэж байна" гэв.
Цөмийн анагаах ухаан нь хүний бие махбодын хэвийн болон эмгэг үйл явцыг цацраг идэвхт изотопын тусламжтайгаар оношлох, эмчлэх аргыг хөгжүүлсэн шинжлэх ухааны залуу салбар юм. 

Монгол улсад УНТЭ-д анх 1975 оны 3 сарын 31 өдөр Эрүүлийг Хамгаалах Яамны сайдын тушаалаар тухайн үеийн Улсын Клиникийн төв эмнэлгийн дэргэд “Цөмийн онош зүйн лаборатори” нэртэйгээр шинэ тасаг байгуулагдаж Монгол улсын анагаах ухааны салбарт цөмийн технологийг нэвтрүүлсэн анхны тулгын чулуу болон өдгөө тасралтгүй 50 жил улсын хэмжээнд үйлчилгээг үзүүлж байна. 
2012-2013 оны төслийн хүрээнд ОУАЭА-ийн болон Монгол улсын засгийн газрын хамтарсан санхүүжилтээр Анхны хосолмол оношилгооны технологи болох 2 толгойт СПЭКТ/КТ дижитал гамма камер авч суурилуулсан.

Энэхүү дэвшилтэт орчин үеийн хосолмол СПЭКТ/КТ аппаратыг суурилуулснаар оношилгоо, эмчилгээний түвшин нэг шатаар дээшилж, эмгэг процессыг эсийн болон молекулын түвшинд оношлохоос гадна нэг шинжилгээний аргаар авах боломжгүй бүтцийн болон үйл ажиллагааны мэдээллийг нэгэн зэрэг өөр өөр дүрслэлээс гарган авах боломжтой болж байна. 

Мөн оношилгооны зөрүү гарах эрсдэлийг бууруулах төдийгүй дараах оношилгоо, эмчилгээний аргачлалуудыг шинээр хийх боломжтой болсон.

Хоёр дахь СПЕКТ/КТ аппаратыг хүлээн авснаар эмчилгээний хүртээмж, чанар, оношилгооны төрөл нэмэгдэнэ гэж үзэж буй. Мөн бодисын солилцооны оношилгоонууд хийх боломжтой болж буйг танилцуулгын үеэр дурдлаа. Эмчилгээ, оношилгоонд шинээр:

1. Хорт хавдрын ясны үсэрхийллийг ялган оношлох, СПЭКТ хийж 3 тэнхлэгээр зүслэг хийх аргачлал
2. Зүрхний цусан хангамжийн болон Gated буюу зүрхний миокардийн булчингийн хөдөлгөөнийг үнэлэх үйл ажиллагааны шинжилгээг нэг дор хийж үнэлгээ өгөх аргачлал
3. Бамбайн сцинтиграфи буюу зураг авалтын шинжилгээг бамбайн үйл ажиллагаа буюу шингээлтийг шинжилгээтэй хамт хийх аргачлал.
4. Хордлогот болон зангилаат бахуутай өвчтөний Иод-131-ын эмчилгээний тунг тогтооход шаардлагатай бамбайн жин, үйл ажиллагааны шингээлтийн үзүүлэлтийг Мо-99/Tc-99м-ыг ашиглан тогтоох аргачлал
5. Бамбайн зэргэлдээх булчирхайн хавдрыг илрүүлэх “Паратиреоид сцинтиграфийн аргачлалуудыг амжилттай нэвтрүүлсэн.
6. Бөөрний үйл ажиллагааны сцинтиграфийн тоон үзүүлэлтүүд нэмэгдэж зургийн чанар эрс сайжирсан төдийгүй зураг угаах гар ажиллагааг халж энгийн принтерээр хэвлэх
7. Радиоиммунологийн лабораторид хийгддэг даавар болон хавдрын маркерын шинжилгээнүүдийг Олон улсын Радиоиммунологийн шинжилгээний гадаад хяналтын программд оруулах аргачлалуудыг тус тус нэвтрүүлсэн байна.