Эдман “Евро-2008"-ыг өнжинө
Шведийн Златан Ибрагимович, Эрик Эдман нар Бразилтай хийсэн нөхөрсөг тоглолтод оролцсонгүй. "Интер"-ийн довтлогч бямба гаригт "Ювентус"-ын эсрэг тоглохдоо мөрөндөө бага зэрэг гэмтэл авсан нь хөндүүрлэж байсан учраас эмч нар түүнд амрахыг зөвлөсөн байна.
Харин Эдман өвдөгний үендээ бэртэл авсны улмаас зургаан сарын курс эмчилгээ хийлгэж байж л талбайд гарах юм.

Сул өрөө байхгүй ч...
Австрийн тал бүх зочид буудал захиалгаа аваад хэдийнэ дуусчихлаа гэж мэдэгдсэн билээ. Гэвч хүмүүс янз бүрийн арга сэдсээр байна. Тухайлбал Кристоф Хофстеттер хэмээх оюутан залуу вэб сайт нээж түүндээ "Евро-2008"-ын үеэр хажуу өрөөгөө түрээслүүлэх хүсэлтэй айлуудыг бүртгэж эхэлжээ. Ингэснийхээ шанд тэрбээр зуучилсан мөнгөнийхөө арван хувийг авах аж.

Брюкнер халаагаа өгнө
Чехийн шигшээг олон жилийн турш амжилттай удирдсан Карел Брюкнер тивийн АШТ-ий дараа ажлаа хүлээлгэж өгөхөө мэдэгдлээ. Тэрбээр 2002 оноос улсынхаа шигшээг дасгалжуулж эхэлсэн бөгөөд 2004 оны Европын АШТ, 2006 оны ДАШТ-д багаа оролцуулжээ. Одоогоор түүнийг орлох мэргэжилтнийг Чехийн хөлбөмбөгийн холбоо хайж эхлээгүй байна.

Линдеротын найдвар тасраагүй
"Би дөрөвдүгээр сард бэлтгэлдээ гарах боломжтой болчихно. Зургадугаар сар гэхэд хэвийн байдалд орсон байна". Туркийн "Галатасарай багт данстай Шведийн хагас хамгаалагч Тобиас Линдерот ийн өгүүлж сууна. Тэрбээр нэгдүгээр сард гуяндаа мэс засал хийлгэсэн юм. Харин Шведийн дасгалжуулагч Л.Лагербек Линдеротыг эдгэлээ ч формондоо ортол багагүй хугацаа шаардагдана гэж үзэж буйгаа орон нутгийн хэвлэлүүдэд өгсөн ярилцлагадаа дурджээ.

Бизнесмэн Муту
Бухарестад Зүүн Европт хамгийн томд тооцогдох шөнийн клуб нээгджээ. Түүний эзэн нь Румыний шигшээ болон Италийн "Фиорентина" багийн довтлогч Адриан Муту ажээ. 1200 ам.метр (үүнээс 800 м2 нь бүжгийн талбай) энэхүү аварга том клуб 2.5 сая еврогийн өртгөөр босчээ.
Харамсалтай нь Муту клубийнхээ нээлтийн ажиллагаанд оролцож амжаагүй байна. Тэр өдөр "Фиорентина" Италийн АШТ-ий ээлжит тоглолтоо "Лацио"-той хийсэн бөгөөд нэлээд чухал тоглолт байсан учир багийн удирдлага Мутуг чөлөөлөөгүй гэнэ.

Талисман тодров
ОХУ-тай хийх нөхөрсөг тоглолтын үеэр Румыний шигшээгийн шинэ бэлгэдэл сахиус болсон Бериньо бүргэдхэнийг олон нийтэд толилууллаа. Румыний хөлбөмбөгийн холбоо шинэ талисман бүтээх уралдааныг хөгжөөн дэмжигчдийн дунд зарласны дүнд Бериньо ялагчаар тодорсон юм. Ялагч-уран бүтээлч шигшээгийн тоглогчдын гарын үсэгтэй бөмбөгөөр шагнуулж, тэдэнтэй зургаа татуулах эрхтэй болжээ.

Р.Манлай