Барууны орнуудын судалгаагаар 2002 оноос хойш давхар ажил эрхлэгчдийн тоо даруй хоёр дахин өссөн тооцоо гарчээ. Үүнийг судлаачид, хүнд олдох боломжыг аль болох алдахгүйг хичээж, улам төгс төгөлдөр, элбэг хангалуунд тэмүүлдэг өнөөгийн хүмүүсийн нийтлэг хэв шинжтэй холбон үзэж байна.

Мөн сүүлийн жил гаруйн хугацаанд дэлхий нийтийг нөмрөөд байгаа санхүүгийн хямрал нь хүнийг илүү болгоомжтой аж төрөх болсонтой холбоотой хэмээн дүгнэж байгаа юм.
Европын хүн амын дундаж давхаргын хүмүүс гол төлөв хоёр дахь буюу давхар ажил эрхэлдэг бөгөөд үндсэн ажлаас гадна хувиараа хөдөлмөр, аж ахуй эрхэлж байна.

Дундаж давхаргад эмч, багш, зохиолч, сэтгүүлч, урлагийнхан болон хуульч зэрэг дээд боловсролтой хүмүүс багтдаг. Бага дунд боловсролтой хүмүүс давхар ажил буюу "халтуур" хийх боломж хомс.

Харин америкт үүнээс тэс ондоо байна. Тодруулбал, бага, бүрэн дунд боловсролтой эсвэл гадаадын дүрвэгсэд голдуу нийгмийн давхаргад хамаарагддаг хүмүүс нь давхар ажил эрхэлдэг гэнэ.

Европын давхар ажил эрхлэгчид голдуу улсын эсвэл хувийн фирмд тодорхой мэргэжлийн алба хашдаг. Харин хувийн эмийн сан, оношлогооны газар, цайны газар, дэлгүүр, номын мухлаг зэргийг ажиллуулдаг.

АНУ-д давхар ажил эрхлэгсэд "хар" ажлуудыг давхар эрхэлдэг. Эдгээр ажлууд нь гол төлөв цагийн ажил, эсвэл санамсаргүй олддог ажлууд байдаг байна. Иймээс тэдгээр хүмүүс гурван давхар ажил хийх тохиолдол бий.

Мэдээж улсын хууль дүрэм хүмүүсийн ажил эрхлэлтэд тодорхой нөлөөлдөг.

Их хөдөлмөрлөж байгаа хүн багагүй орлого олно. Гэтэл орлогоос төлөх татварын асуудалд төрийн зохицуулах бодлого, хяналт шаардлагатай болдог.

Европын дунд давхаргын өндөр боловсролтой "ухаалаг сэхээтнүүд" давхар ажил эрхэлж, татвараа ч үнэн зөв төлөх нь хямралаас гарахад туслана хэмээн үздэг гэнэ.

Тэгээд ч хяналт харьцангуй өндөр учраас хууль журмаараа явахаас өөр аргагүй.

Харин америкг хэд хэдэн ажил давхар эрхлэх нь аль эртнээс энгийн зүйл мэт болсон үзэгдэл. Тэнд хүн үндсэн ажлаас гадуур "халтуурны" ажлыг хавсруулж эрхэлдэг нь хэнд ч нууц биш ээ.

Хэдийгээр ажилгүйдлийн тоо улс орон бүрт өсөх хандлага ажиглагдаж байгаа ч хүмүүс давхар ажил эрхлэхийг ихээхэн сонирхох болсон.

Ялангуяа ам бүлийн тоо өндөр, гэр бүлд ажил эрхлэгч гишүүний тоо бага байгаа тохиолдолд хөдөлмөрийн насны хүмүүс боломжыг ашиглан давхар орлого олохыг эрмэлздэг болжээ. Зарим нэгэн улс оронд цөөн цагаар бага орлого бүхий ажил эрхлэгчдийг татвараас чөлөөлдөг хуультай.

Энэ нь хүмүүсийг өндөр цалинтай тогтвортой үндсэн ажлаас илүүтэйгээр хоёр давхар үндсэн бус, гэрээт ажилд хошуурах шалтгаан болсон.