Гиннесийн хамгийн олон дэлхийн дээд амжилтын эзэн буюу Нью-Йорк хотын иргэн Ашрита Фурман өөрийн багийн 25 туслахын хамт 3041 кг жинтэй мөсөн чихэр хийснээр амжилтаа ахиулжээ. Энэ нь ердийн хэмжээтэй 165.070 ширхэг мөсөн чихэртэй тэнцэх аж. Ашрита энэхүү амжилтаа өөрийг нь болон хүн төрөлхтнийг хүндийн өргөлтийн дээд амжилтууд, Даян дэлхийн эв найрамдлын гүйлтээрээ урамшуулсан нэрт философич, яруу найрагч, тамирчин  Шри  Чинмой агсны мэндэлсэн өдөрт зориулсан гэнэ.

Уг мөсөн чихрийн урт нь иштэйгээ нийлээд 7.5 метр, зузаан нь 25 см, диаметр нь гурав, тойргийн урт нь 9.42 метр болсон бөгөөд элсэн чихэр, эрдэнэ шишийн шүүс ашиглан долоо хоногийн турш хийсэн ажээ. Үүгээрээ өмнөх амжилтыг тогтоосон 2158 кг жинтэй мөсөн чихрийг давж, аварга амттанг үзэхээр ирсэн олныг баярлуулжээ. Ашрита Фурман 1979 онд дэвхрэгч төхөөрөмжөөр 27 мянган удаа дэвхэрч явсан нь түүний анхны Гиннесийн дэлхийн дээд амжилт байж. 2009 онд тэрбээр Гиннесийн 100 дээд амжилтыг ганцаараа эзэмшиж буй дэлхийн анхны хүн болсон юм. Бясалгалаар хичээллэдэг 54 настай энэ эр одоогоор 98 дээд амжилтыг эзэмшиж байна.