Caйхaн төрснийхөө сайн мууг хангалттай эдэлж яваа топ модель Э.Одгэрэл сүүлийн үед нам жим амьдрах болсныг бие давхар болсон гэж тайлбарлах хүмүүс олон байна.

Загварын тайзнаа урдаа хэнийг ч гишгүүлдэггүй энэ хатагтай өдгөө дөч гарч яваа ч өөрийгөө үргэлж залуу сайхнаараа гэж төсөөлдөг нь гоо сайхных нь нууц жор ч байж болно. Олон жил ганц бие амьдралыг сонгож эрх дураараа загварын тайзнаа “туучсан” тэрээр өөрийгөө найз залуутай гэж ам бардам хэлдэг ч хэн гэдгийг нь нууцалдаг. Нэгэн цагт “Би хайрлуулахын заяатай” гэж бардамхан мэдэгдэж байсан тэрээр нас биед хүрч буй ганц охиндоо дүү гаргаж бүл нэмэхээр шийдсэн бололтой. “Оддын хотхон”-д амьдардаг түүнийг хөршүүд нь тоотойхон харах болж.

Эхэн үедээ шинэхэн хөрш эрчүүд нь байраа тойрч дугуй унан давхих топ модельд нүд унаган эхнэрүүдийнхээ уурыг бардаг байсан гэдэг. Түүнийг Сайншандад шатахуун түгээгүүрийн газартай гэж бэл бэнчингээр нь шивэр авир хийдэг байсан. Харин топ модель бүсгүй бизнесийн шаггүй сонголт хийж манай урдаа барьдаг “Улаанбаатар” зочид буудалд үнэт эдлэлийн бутик нээж хэсэгтээ хүүхнүүдийг хуйлруулсан. Нэртэй бизнесмэнтэй нэр холбогдоод чамгүй олон жилийг өнгөрүүлсэн топ моделийн хувийн амьдрал одоо л нэг тэгширч олны хэл амнаас ангид байгаад ойр дотныхоных нь санааг амрааж байна. Эмэгтэй хүнийх нь хувьд ахдаж ихэдсэн дэндүү атаа хорсол, увайгүй дайралтууд түүн рүү чиглэгддэг. Тэр болгоныг хүндээр хүлээж авдаггүй ээ гэж ярих дуртай Э.Одгэрэл хэдэн сарын өмнө хуримын хувцасны загвар өмсөж нэгэн сэтгүүлд зургаа авахуулсан нь илүү ялдам жаргалтай төрхийг илэрхийлсэн нь шинэ хүний сурагтай нь ч холбоотой байх.