Улсын Их Хурлын чуулганы нэгдсэн хуралдааны үдээс хойших хуралдаан эхэллээ.

Ерөнхий сайд Л.Оюун-Эрдэнэ асуулгын хариуг өгөв. Тэрээр "Монгол Улс анх удаа баялгийн нэгдсэн сантай боллоо. Парламентад суудалтай гурван намын дарга нар энэ хуулийн төсөл дээр зөвшилцөж чадсан. АН, ХҮН-ын дарга нарт талархаж байна. Баялагтаа эзэн болох эхлэлийг энэ хуулиар тавилаа. Сингапурын баялгийн сангийн зарчмаар энэ хуулийг баталсан. Үржүүлэхийн хүрд шиг ажиллаж чадвал орон сууцны санхүүжилтийг энэ сангаас бүрдүүлэх, эдийн засаг тэлэх боломжтой. Бид эдийн засгаа 100 их наяд төгрөгт хүргэхийг зорино.

Монголын баялагт эзэн суусан, цөөн тооны хэдэн гэр бүл энэ хуулийг Үндсэн хуулийн цэцэд өгч, баялагт үргэлжлүүлэн эзэн суух хүсэлтэй байна. Та бүхэн тэр цагт хуулиа хамгаална гэж найдаж байна. Цагийн аясаар бүх зүйл үнэнд тулж очно. Мөнгөний ул мөр  хэзээ ч алга болдоггүй. Өнөөдөр бол манай улсын эргэлтийн түүхэн цэг юм. Уул уурхайн баялгийг хүртээмжтэй болгох талаар бид олон жил ярьсан. Одоо үүнийг хэрэгжүүлэх цаг болсон" гэв.

Чуулганы хуралдаанд 41 гишүүн оролцож, Үндэсний баялгийн сангийн тухай  хуулийн төслийг 39 гишүүн дэмжиж, хуулийг баталлаа.