Нийслэлийн 2025 оны төсвийн төслийг Нийслэлийн Засаг даргын тамгын газраас НИТХ-д танилцуулав. Уг төсвийн төсөлд нийслэлийн аудитын байгууллагаас дүгнэлт гаргажээ. Тус дүгнэлтийг Нийслэлийн төрийн аудитыг газрын дарга Ч.Болд танилцууллаа. 

Тэрээр “Нийслэлийн 2025 оны төсвийн төслийг арвилан хэмнэх, үр ашигтай, зардал бууруулах, орлого нэмэгдүүлэх, төсвийн санхүүжилтийг үр ашгийг дээшлүүлэх боломжийг бүрэн тусгасан эсэхэд дүгнэлт гаргах нь аудитын зорилго юм.

Төслийг боловсруулахдаа төр, хувийн хэвшлийн хамтын ажиллагааг идэвхжүүлж, хотын эдийн засгийг тэлэх бодлогыг хэрэгжүүлэх, гэр хорооллыг орон сууцжуулах, агаарын бохирдлыг бууруулах, нийслэлийн холбоос замуудыг нэмэгдүүлэн  нийтийн тээврийн салбарт шинэчлэл хийх замаар авто замын түгжрэлийг бууруулах, өнгөрсөн жилүүдэд эхлүүлсэн хөрөнгө оруулалтын ажлыг бүрэн дуусгаж, нийгмийн суурь үйлчилгээний хүртээмжийг нэмэгдүүлэх үндсэн чиглэл, бодлогыг баримталсан байна.

Нийслэлийн 2025 оны төсвийн төлөвлөгөөнд 5 зорилт, 382 төсөл арга хэмжээг хэрэгжүүлэхээр тусгажээ. Нэгдүгээрт, нийслэлийн төсвийн орлогыг 3.9 тэрбум төгрөгөөр нэмэгдүүлэх дараах боломжууд байна.

Нийслэлийн санхүүгийн тайлангаар авлагын үлдэгдлийг 2025 онд барагдуулах авах арга хэмжээг хэрэгжүүлэх боломжтой.

Нийслэлийн хөдөлмөр эрхлэлтийн 2014-2017 оны хооронд 123 хадгаламж зээлийн хоршоодод хоёр жилийн хугацаатай 14.3 тэрбум төгрөгийн зээл олгосон бөгөөд арваннэгдүгээр сарын байдлаар 6.7 тэрбум төгрөгийн үлдэгдэлтэй байна. Дээрх зээлийн 30 хувийг барагдуулахад хоёр тэрбум төгрөгийн орлого олох боломж байна.

Нийслэлийн төсвийн зарлагыг 16.2 тэрбум төгрөгөөр бууруулах дараах боломжууд байна. Үүнд:  

НЗДТГ-ын бусдаар гүйцэтгүүлэх ажил үйлчилгээний төлбөр, хураамжийн зардалд төсөвлөлтийн шаардлага хангаагүй, тооцоо судалгаагүй, нотлох баримтаар дэмжигдээгүй 2.1 тэрбум төгрөгийн арга хэмжээг төлөвлөсөн байна.

• Тухайлбал нийслэлийн хэмжээний мөнгөн хөрөнгийн оновчтой удирдлагыг хэрэгжүүлэх, судалгаа хийх, зөвлөх үйлчилгээ үзүүлэх арга хэмжээнд 200 сая төгрөг, Нийслэлийн үнэт цаасны болон өрийн удирдлагын журам боловсруулах, судалгаа хийх, зөвлөх үйлчилгээ авахад 200 сая төгрөг, ах дүү найрамдалт харилцаатай хотуудтай хамтран худалдаа, эдийн засгийн олон улсын форум, арга хэмжээ зохион байгуулахад 1.7 тэрбум төгрөг төсөвлөсөн.
• Нэг удаагийн шинжтэй, тэвчиж болох, үр ашиггүй үрэлгэн зардалд 1.6 тэрбум төгрөг төсөвлөжээ. Тухайлбал шинэ жилийн баярын цэнгүүн зохион байгуулахад 400 сая, бүтээлч од төсөлд 950 сая, өмгөөллийн хуулийн зөвлөгөө авахад 60 сая, хууль тогтоомжийн судалгаа хийхэд 40 сая, эх оронч сурагч аянд 200 сая төгрөг, дүрмийн санг хөрөнгө гэх нэршилтэй үйл ажиллагаанд 9 тэрбум төгрөг төсөвлөсөн байна.  
• Нийслэлийн 2025 оны хөгжлийн төлөвлөгөө хэрэгжүүлэх арга хэмжээний зардалд нотлох баримтаар нотлогдоогүй, хэрэгцээ шаардлага тодорхойгүй, үйл ажиллагааны чиг үүрэг давхардсан арга хэмжээнд 3.5 тэрбум төгрөгийг төсөвлөсөн байна.  

Тухайлбал соёлын эрхийн бичгийн туршилт, үйл ажиллагааг эхлүүлэхэд 100 сая, төр, хувийн хэвшлийн түншлэлийн хүрээнд төрөөс үзүүлэх зарим үйлчилгээг иргэний нийгмийн байгууллага, ТББ, хувийн хэвшлийн байгууллагаар гүйцэтгүүлэхэд 200 сая, бусад арга хэмжээний зардалд 2.9 тэрбум, авлигатай тэмцэх ажиллагаанд 200 сая төгрөг төсөвлөжээ" гэв.