Орчин үеийн таван төрөлтийн холбооноос зохион байгуулдаг лазер гүйлтийн УАШТ боллоо.

Лазер гүйлтийн Монгол Улсын аварга шалгаруулах тэмцээн гурав дахь жилдээ амжилттай зохион байгуулагдан 2025 оны улсын аваргуудаа тодруулжээ.

Энэ удаагийн тэмцээн төрийн, цэргийн байгууллагуудын алба хаагчид болон спорт сонирхогчид дунд эрэгтэй элит, эрэгтэй-эмэгтэй насанд хүрэгчид болон эрэгтэй-эмэгтэй сонирхогчид гэсэн таван ангиллаар зохион байгуулагдан 75 тамирчин оролцжээ.

Тэмцээний оргил төрөл болох эрэгтэйчүүдийн элит ангилалд өрсөлдсөн тамирчид 3,000 метр зайд уралдан, 10 метрээс буудлага гүйцэтгэсэн байна.
 
Элит ангиллын медалын эздээр:

1. С. Бат-Отгон (Орчин үеийн 5 төрөлтийн холбоо)
2. А. Билэгт (Орчин үеийн 5 төрөлтийн холбоо)
3. Э. Төртогтох (Хилийн цэргийн 0303-р ангийн ахлах ахлагч, спортын мастер) тус тус тодорчээ.

Модерн пентатлон буюу орчин үеийн таван төрөлт спорт нь усанд сэлэлт, туялзуур сэлэм, саадтай гүйлт, лазер буудлага, гүйлт гэсэн таван өөр спортын төрлийн нэгдэл бөгөөд 1912 оноос хойш тасралтгүй Зуны Олимпын наадмын нэг спортын төрөл байсаар ирсэн.

Орчин үеийн таван төрөлтийн тэмцээнүүдийг пентатлон (4 төрөл), тетратлон (3 төрөл), эсвэл лазер-гүйлт буюу гүйгээд буудах зэрэг олон хувилбараар зохион байгуулж болдог онцлогтой.

Эх сурвалж: Монголын орчин үеийн таван төрөлт спортын холбоо