НИТХ-ын Төлөөлөгч Д.Энхжаргалангийн ажил дээр АН-ын гишүүн Д.Мөнх-Эрдэнэ очиж түүнийг үг хэлээр доромжилж, гар хүрэхийг завдсан. Харин Д.Энхжаргалан энэ талаар мэдээлэл хийлээ.

Тэрбээр "Миний бичсэн посттой холбоотой надаас асуулт асуухаар орж ирсэн юм болов уу гэж бодсон чинь бэлдсэн өөр асуултуудаа асуугаад явлаа. "Лайвчин" Д.Мөнх-Эрдэнэ хэр хугацаанд бэлдсэнийг нь мэдэхгүй ч өөрөө 20 гаруй асуулт бэлдэж иржээ. Намайг ярих завдал гаргалгүй өөрөө асуугаад өөрөө хариулаад байсан тул энэхүү мэдэгдлийг албан ёсоор хийж, хариулт өгье" хэмээгээд хэлсэн мэдэгдлүүдийг нь хураангуйлж, онцолбол:

Цэнгэлдэхийн ногоон зүлэг дээр хиймэл бороо оруулж шалгаж үзнэ.

- Өөрийн хувийн компаниас 10 ажилтныг ажиллуулдаг гэсэн. Энэ бол гүтгэлэг. Би ажиллах хугацаандаа сонгон шалгаруулалтын журмаар компаниасаа хоёр ажилтнаа авсан нь үнэн. Үүнийг би хууль зөрчсөн гэж бодохгүй байна.

- Би нэг ч удаа тендер авч үзээгүй. Гэтэл намайг 25 тэрбум төгрөгийн тендер авсан гэж гүтгэсэн.

- 2024 онд шилэн данс хөтлөөгүй нь үнэн ч одоогоор хэвийн хөтлөөд явж байна.

- Бүтцийн хувьд өөрчлөлт орсон ч энэхүү тушаал шийдвэр ТУЗ-өөр батлагдсан, ном журмын дагуу явж байна.

- ТУЗ-ийн гурван гишүүнийг хассан гээд байсан. Надаас өмнө байсан хүмүүсийг хэлээд байх шиг байна лээ. Тэгэхээр би мэдэхгүй.

- Постын тухайд эцэг хүний хувьд хүүхдэдээ "Ийм орчин байдаг шүү" гэдэг байдлаар хогийн цэгийг харуулсан.

- Иргэн Х.Б-г ажлаас халсан гэсэн. Захирлын туслахаар орж ирсэн залуу удаа дараа архи дарс ууж, байгууллагын эд хөрөнгийг зөвшөөрөлгүй ашиглаж, өр зээл тавьсан тул ажлаас халсан. Сонгуулиар ажиллахдаа 4,5 сая төгрөгийн цалин аваад ажилласан. Ажлын байрны шаардлагыг хангахгүй байсан тул ажлаас нь халсан. Тэр хүнээс л Д.Мөнх-Эрдэнэ мэдээлэл авсан юм болов уу гэж бодож байна.

- Бидний хийсэн бүтээн байгуулалт болох Шинэ Драгон төв нь зах биш. Нийт 100 гаруй тэрбум төгрөгийн банкны зээлээр хэрэгжүүлсэн. Автобусны зогсоол B1 давхартаа байдаг. Монголд байхгүй терминал бүтээн байгуулалт.

- Цэнгэлдэхийн ногоон зүлэг хангалттай сайн тавьж чадаагүйдээ уучлалт гуйсан. Энэ жил үндэсний бөхийн холбооныхонтой уулзаж, засаж сайжруулах саналыг албан бичгээр авлаа. Сайжруулахаар ажиллаж байна. Хиймэл, устай бороо оруулж шалгаж үзнэ.

-Наадмын нээлтийн шагийн тасалбар энэ жил өсөх нь тодорхой. 12000 тасалбар хүрэлцэхгүй байгаа. Тиймээс саалиа бэлдэхээр саваа бэлд гэдэг шиг бид саваа томруулахаар ажиллаж байна.

- Миний сошиал хаягийг 127 мянган хүн дагадаг. Би мөнгө төлж 2000 вьетнамчуудаар лайк даруулах хүн биш. Хаанаас хэн намайг ноолж болно гээд хүн явуулаад байгааг мэдэхгүй ч өнөөдөр та нар тодорхой хэмжээнд санасандаа хүрлээ.