АНУ-ын ерөнхийлөгч Дональд Трамп лхагва гарагт бараг бүх улсад импортын 10 хувийн суурь татвар ногдуулах шийдвэрээ танилцууллаа. Түүний энэ шийдвэрийг дэлхийн бусад удирдагчид хэрхэн хүлээн авав?

Мексикийн ерөнхийлөгч Клаудиа Шэйнбаум: АНУ-ын татварын эсрэг хариу цохилт өгөх бус цогц арга хэмжээ авна. Ямар ч нөхцөл байдалд эдийн засгаа бэхжүүлэх төлөвлөгөөтэй байна.

Канадын ерөнхий сайд Марк Карни: Трамп Канад, АНУ-ын худалдааны харилцааны хэд хэдэн чухал зүйлийг хадгалж үлдсэн. Гэхдээ фентанилын татвар хэвээр үлдсэн бөгөөд ган, хөнгөн цагааны татвар ч мөн хүчинтэй байна. Бид эдгээр татварт хариу арга хэмжээ авч, ажилчдаа хамгаалж, Их долоогийн хамгийн хүчирхэг эдийн засгийг бий болгоно.

***Мексик, Канад улсуудад сүүлд зарласан 10 хувийн суурь татвар үйлчлэхгүй. Тус улсуудын бараанд 25 хувийн татвар ногдуулж буй.

Их Британийн ерөнхий сайд Кир Стармер: АНУ-тай худалдааны дайн эхлүүлэх нь ухаалаг алхам биш. Бид тайван, бодитой байр сууринаас хандахыг эрмэлзэж буй бөгөөд хариу татвар ногдуулахгүй байхаар шийдсэн. 

***Их Британид 10 хувийн татвар ногдуулж буй.

Японы Төв банкны тэргүүн Казүо Уэда: Эдгээр татвар олон улсын худалдааны үйл ажиллагаанд томоохон нөлөө үзүүлнэ. Энэ бол харамсалтай явдал. Одоогоор тодорхойгүй зүйл олон байгаа тул бодлогын өөрчлөлтүүд эдийн засагт үзүүлэх нөлөөг судалж, нөхцөл байдлыг анхааралтай ажиглана. 

***Японд 24 хувийн татвар ногдуулж буй.

Бразилын Гадаад хэргийн яам: АНУ бидний экспортод 10 хувийн нэмэлт татвар ногдуулахаар шийдвэрлэсэнд харамсаж байна. Бразилын Засгийн газар хоёр талын худалдааны харилцаанд харилцан ашигтай нөхцөл бүрдүүлэхийн тулд Дэлхийн худалдааны байгууллагад хандах зэрэг боломжит бүх аргыг судалж байна.

***Бразилд 10 хувийн татвар ногдуулж буй.

Австралийн ерөнхий сайд Энтони Албанез: Трампын засаг захиргааны татварууд нь ямар ч логик үндэслэлгүй бөгөөд манай хоёр улсын түншлэлийн зарчмуудын эсрэг байна. Энэ бол холбоотон улсаас гарах үйлдэл биш. Өнөөдрийн шийдвэр нь дэлхийн эдийн засгийн тодорхойгүй байдлыг нэмэгдүүлж, америкчуудын зардлыг өсгөнө.  

***Австралид 10 хувийн татвар ногдуулж буй.

Италийн ерөнхий сайд Жоржиа Мелони: Бид АНУ-тай тохиролцоонд хүрэхийн төлөө бүхнийг хийх бөгөөд худалдааны дайн өрнөхөөс зайлсхийхийг эрмэлзэнэ. Учир нь энэ дайн нь барууны орнуудын хүчийг сулруулж, бусад улсыг ашиг сонирхлыг нэмэгдүүлэх болно.

Шведийн ерөнхий сайд худалдааны дайн хүсэхгүй байна гэсэн бол Ирландын ерөнхий сайд АНУ Европын холбоонд импортын 20 хувийн татвар ногдуулах шийдвэр харамсаж буйгаа илэрхийлсэн. 

Эх сурвалж: Reuters, BBC