Монгол Улс, Бүгд Найрамдах Польш Улсын харилцаа шинэ шатанд гарч буйг илтгэх олон улсын эрдэм шинжилгээний бага хурал өнөөдөр /2025.06.05/ боллоо.

Энэхүү бага хурлын үеэр Польшийн Элчин сайд “Хоёр орны дипломат харилцаа тогтоосны 75 жилийн ой тохиож буй энэ онцгой үед Польш Улс Европын Холбооны Зөвлөлийг даргалж буйтай давхцан, энэхүү эрдэм шинжилгээний хурлыг зохион байгуулж буй нь чухал ач холбогдолтой.

Энэ оны гуравдугаар сард Польш Улсад хийсэн Ерөнхийлөгч У.Хүрэлсүхийн төрийн айлчлалын үеэр олон чухал баримт бичгүүдэд гарын үсэг зурсан. Мөн хоёр улсын худалдааны хэмжээ 100 сая ам.долларт хүрээд байна. Энэ бүхэн нь манай хоёр улсын харилцаа бүх түвшинд өргөжин хөгжиж буйн тод жишээ’' гэв.

Хурлаар Польш, Монголын улс төр, эдийн засгийн шинэчлэл, худалдаа, эдийн засгийн хамтын ажиллагааны өнөөгийн төлөв байдлыг хэлэлцэж, цаашдын хөгжлийн боломж, чиг хандлагын талаар гүнзгий санал солилцсон юм.
Бага хуралд Польшийн Варшавын их сургууль, Ягеллоны их сургууль, Вроцлавын их сургууль, Краковын Хөдөө аж ахуйн их сургууль, Вистула эдийн засаг, бизнесийн их сургууль зэрэг нэр хүндтэй их дээд сургуулийн төлөөлөгчид, эрдэмтэн судлаачид оролцож илтгэл тавилаа.

Б.Төрбаяр