Вьетнам улсад болж буй Азийн бүсийн аварга шалгаруулах шатрын тэмцээн үргэлжилж байна. Бүх өргийн эцсийн дүнгээр шатрын дэлхийн аварга шалгаруулах тэмцээнд Ази тивийг төлөөлөн оролцох тамирчдын нэр, амжилт тодрох юм. Манай улсаас энэ удаагийн тэмцээнд 10 тамирчин оролцож байгаа. Харин эмэгтэйчүүдийн тэмцээний дүн гарч шатрын их мастер Б.Мөнгөнтуул аваргын алтан медалийг хүртэж эх орондоо ирлээ.

Түүний энэхүү амжилтыг үнэлж Монголын шатрын холбооны тэргүүлэгч гишүүд их мастер Б.Мөнгөнтуулыг хүлээн авч, хүндэтгэл үзүүлсэн байна.

Зүүн Азийн 30 гаруй орны эмэгтэй шатарчдаас хурц ухаан, уран нүүдлээрээ шалгарсан Б.Мөнгөнтуул тус тэмцээний аварга болсноор манай гаригийн шилдэг 64 шатарчны өрсөлдөх дэлхийн шатрын аварга шалгаруулах тэмцээнд оролцох эрхтэй болжээ. Их мастерыг хүлээж буй дараагийн тэмцээн ирэх сарын 24-нд БНХАУ-д болно. Үүнд дэлхийн шилдэг 10 эмэгтэй шатарчин өрсөлдөх ажээ. Харин дээрх тэмцээнд эх орноо төлөөлөн оролцож буй эрэгтэй шатарчдаас зургаа нь медалийн төлөө өрсөлдөх магадлалтай байна.

Б.Түвшинтулга