Иргэний нисэхийн ерөнхий газар түүний харъяа байгууллагад нисэхийн болон нислэгийн аюулгүй ажиллагааны хангалт, түүнд тавих хяналтаа сайжруулах, хэвийн, найдвартай ажиллах, байгууллагын өмч хөрөнгийг үер ус, аянга цахилгаан, байгалийн аюулаас хамгаалах, сэргийлэх, хийсэн ажлаа тайлагнахыг харъяа бүх салбар, алба, байгууллагын удирдлагадаа үүрэг болголоо.

Тухайлбал, “Чингис хаан” болон орон нутгийн нисэх буудал, албадын хэвийн ажиллагаа хангах, нислэгийн зурвас, тоног төхөөрөмжийн байр, обьектыг үер уснаас хамгаалах далан, суваг шуудууг лаг, хог хаягдлаас цэвэрлэх, шаардлагатай бол нэмж суваг шуудуу татах, эдгээр обьектын хашаа, суваг шуудуу, дээвэр болон цахилгаан, холбоо, сантехникийн шугам, сүлжээ, кабель, шон, худаг, аянга зайлуулагч, замыг үер ус, борооны дараа мөн борооны улиралд үзлэг шалгалт хийж, арга хэмжээ авахыг даалгажээ.

Үер усны аюулын үед “Онцгой байдлын үед ажиллах журам” хэрэгжүүлэх, цаг агаарын урьдчилан сэргийлэх мэдээг тухай бүр авч, үер усны аюулаас хамгаалах, сонор сэрэмжээ дээшлүүлж, ажлын байр, обьект, тасалгааны цонх, салхивчийг тогтмол хааж явах, харуул, жижүүр байнгын үзлэг хийх, тухайн орон нутгийн онцгой байдал, холбогдох байгууллагын утасны жагсаалтыг шинэчилж, үер усны аюулын үед ажиллах зааварчилгааг мэргэжлийн байгууллагаас авах, удирдах дээд байгууллагад мэдээлэл тогтмол өгч байх үүрэг өгсөн аж.

Б.Дэлгэр