УИХ-ын чуулганы үдээс өмнөх хуралдаан дууслаа. Хуралдаанаар Эрхтэн, эд, эс шилжүүлэн суулгах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэх асуудлыг хэлэлцэв.

УИХ-ын гишүүн Б.Бат-Эрдэнэ “Мөнгө хэрэгтэй байна, нэг бөөрөө заръя гэх агуулгатай инээдмийн кино байна. Мөн намайг ШӨХТГ-ын даргаар ажиллаж байхад “Ааваа зарна” гэх киноны асуудал хөндөгдөж байсан. Эд, эрхтний наймаатай холбоотой асуудал давхар хөндөгдөнө. Тэгэхээр сурталчлах асуудал дээр яаж зохицуулалт хийх вэ.

Мөн осолд ороод тархины үхэлтэй болбол донор болохоо илэрхийлэхтэй холбоотой асуудал байна. Намайг нас барчихвал ингээрэй гэх мэтээр хүмүүс сошиал дээр өөрсдөө шууд бичих жишээтэй. Энэ гэрээслэл мөн үү, биш үү. Өөрөө зөвшөөрсөн ч ар, гэр нь хүлээн зөвшөөрөхгүй асуудал үүсдэг. Үүнийг яаж авч үзэх вэ. Донорын гэрчилгээ авчихлаа гэж бодъё. Тэгвэл эрхтэн шилжүүлэхтэй холбоотой донорын аюулгүй байдал, ёсзүйн асуудлыг хэрхэн зохицуулах вэ. Санаатай, санаандгүй байдлаас донороо хэрхэн хамгаалан авч үлдэх вэ” гэж асуув.

Үүнд УИХ-ын гишүүн Ж.Чинбүрэн “Та амьд ахуйдаа за л гэж хэлбэл аюул, золгүй явдал учрахад та донор болно л гэсэн үг. Гэвч ар гэр нь үгүй гэсэн бол за бол за гэж дайрахгүй. Ар гэрээс нь таны хайртай хүн тэгж хэлжээ гэх байдлаар дахин асуух тогтолцоог хуульд тусгаж өгсөн. Иргэдийн донорын талаар мэдлэг, боловсрол сайн биш байгаа. Тиймээс таниулж мэдүүлэх, ойлгуулах чухал.  Ер нь "би донор болно" гэдэг мэдээллийг нуух нь чухал” гэлээ.