Монгол Улсад Нисэх хүчин үүсгэн байгуулагдсаны 100 жилийн түүхт ой тохиож буй. Энэ хүрээнд Зам, тээврийн яам, Иргэний нисэхийн ерөнхий газар, “Монгол шуудан” ХК хамтран "Монгол Улсын Нисэх хүчний 100 жил” сэдэвт шуудангийн шинэ маркийг бүтээж, гүйлгээнд гаргалаа.

Арга хэмжээг нээж Зам, тээврийн сайд Б.Дэлгэрсайхан "Нисэх хүчний 100 жил гэдэг бол Монгол Улсын нисэх хүчин, агаарын тээвэр, иргэний нисэхийн түүхэн хөгжил дэвшлийн бодит илэрхийлэл юм. Манай улс анх 1925 онд нисэх онгоц ашиглаж эхэлснээс хойш өдгөө дэлхий дахинд хүлээн зөвшөөрөгдсөн, орчин үеийн дэвшилтэт технологийг хослуулсан, найдвартай агаарын тээврийн системийг бий болгож чадсан. 
Ойн хүрээнд гаргаж буй шуудангийн марк бол нисэх хүчин, агаарын тээвэр, иргэний нисэхийн бахархалт түүх, хичээл зүтгэлийг мөнхөлсөн нэгэн бэлгэдэл юм. Тус марк нь зөвхөн цуглуулгын эд зүйл бус, харин бидний нисэхийн салбарт хийж бүтээсэн ололт амжилт, сорилт бэрхшээлийг даван туулсан түүхийн бэлгэ тэмдэг болох юм” гэв. 

Дашрамд дурдахад, марк нь харилцаа, холбооны чухал хэрэгсэл болохын хувьд тухайн улс орныхоо түүхийг өгүүлж, хөгжлийн түвшинг тодорхойлохын зэрэгцээ олон орны марк сонирхогчдын цуглуулгад багтдаг үнэт цаас юм.

Эх сурвалж: ЗТЯ