Хэт нимгэн гялгар уутыг хэрэглээнээс хасах Улаанбаатар хотын захирагчийн  шийдвэр гарсантай холбогдуулж "ОБ пластик" компаниас сэтгүүлчдэд мэдээлэл хийлээ. 50 гаруй ажиллагсадтай тус компани өдөрт 100000 ширхэг гялгар тор үйлдвэрлэдэг байна.

Эднийх  түүхий эд болох полиэтиленээ урд, хойд хөршөөс оруулж ирдэг ажээ. Манай хэрэглэгчдийн "шар тор", "арвын уут"  хэмээн нэрлэдэг Хятад улсад үйлдвэрлэсэн гялгар уутыг  хаягдал хогийг дахин боловсруулах замаар хийдэг учраас  эрүүл ахуйн шаардлага хангадаггүй байна. Хэвлэлийн бага хурлын зорилгын талаар "ОБ пластик" компанийн гүйцэтгэх захирал О.Амарсайханаас тодрууллаа.

-Байгаль орчинд муу нөлөөтэй гялгар уутыг үйлдвэрлэхээ зогсоож, цаасан уутны үйлдвэрлэл явуулах боломж байгаа юу?
-Гялгар уут хэрэглээнээс хасах  ямар ч боломжгүй юм л даа. Донорын цусыг пластик уутанд хадгалах гэх мэт анагаах ухааны салбарт ч гялгар уутыг өргөнөөр хэрэглэж байна. Гол нь бид өөрсдөө зөв  хэрэглэж, хогоо ил задгай хаяхгүй байх хэрэгтэй. Цэвэр түүхий эдээр бүтсэн гялгар уут 20-50 төгрөгөөр үйлдвэрээс гардаг бол цаасан уут 100-150 төгрөгт гардаг. Хэрэглэгчид ийм үнэтэй уут худалдан авах боломжгүй шүү дээ. Дээрээс нь манайд цаасан уут үйлдвэрлэх модны нөөц байгаа эсэхийг бодож үзэх хэрэгтэй.

- Хаягдал гялгар уутыг  дахин боловсруулах замаар хог хаягдалтай тэмцэж болох уу?
-Манай компани өөрийн хэмжээндээ хог хаягдлын эсрэг үйл ажиллагаа явуулдаг. Үйлдвэрийхээ дэргэд дахин боловсруулах үйлдвэр нээн ажиллуулж  байгаа. Улаанчулуутын хогийн цэгээс өдөрт нэг тонн хаягдал гялгар уутыг 100000 төгрөгөөр худалдаж аваад дахин боловсруулж хуванцар шон үйлдвэрлэж байна. Модны нөөц багатай манай оронд энэ бол их хэрэгтэй үйлдвэрлэл юм. Модоо огтолж хашаа барихын оронд хуванцар шон ашиглаж болох юм.

Г.Алтанзул